SIBU: Kaban Parlimen (MP) Oscar Ling ngansak peranak Sibu kelebih agi raban penatai pemisi ninting bulan 40 peratus pemadu baruh (B40) ti nerima Bantu Sara Idup Rayat (BSHR) minta Skim Perlindungan Nasional B40 tauka Skim mySalam.
Nitihka iya, takaful Skim mySalam tu mungkur 45 iti bansa penyakit ti berat enggau ditan ba sepital pengelama nyentuk 14 hari setaun nyengkaum pesakit Covid-19 ti deka nerima pemaik sepital RM50 sehari ungkup timpuh 14 hari.
“Sentang ba penyakit berat ungkup penerima Bantu Sara Idup (BSH) iya nya sepenyampau RM8,000 deka diberi enggau chara ‘one-off’.
“Lalu ba raban M40 tauka ukai penerima BSH, sida deka nerima pemaik ba atas penyakit berat sepenyampau RM4,000 ‘one-off’, ku iya madah nengah penerang media, kemari.
Iya nerang, MySalam meri insurans enggau takaful pengerai enda bebayar ngagai raban bepenatai pemisi baruh ti nitihka ba pematut enggau udah dipejalaika berengkah 1 Januari 2019 nyin tadi.
Ku iya, perintah ngungkupka belanja keterubah sepenyampau RM2 bilion, nyadika bantu ungkup raban nya napi pemar ari penusah napi penyakit berat enggau berubat di sepital ti ulih meri empas ngagai belanja pemisi isi rumah sida.
“Skim tu entara siti chara ti beguna diambi perintah dikena numbuhka rentayan pengelikun rama ari sukut insurans enggau takaful pengerai ungkup raban bepenatai pemisi baruh ti enda bebayar.
“Perintah mega udah ngerembaika Skim mySalam ngagai raban M40 pengudah urung 4.3 juta rayat ari raban B40 bulih pemaik ari nya,” ku iya.
Nya alai, raban isi rumah penatai pemisi kurang baruh ari RM100,000 (M40) ke beumur entara 18 nyentuk 65 taun diatu ulih ngerejista Skim Perlindungan Kesihatan Masyarakat (mySalam) berengkah 11 Februari 2020 ngagai 31 Mac 2020.
Perintah mega mutuska deka ngerembaika agi skim mySalam nengah tikas umur ari 55 ngagai 65 taun nerima Bantu Sara Hidup (BSH) sereta laki bini sida,” ku Ling agi.
Nya alai, pengawa ngerejista mySalam ulih digaga nengah ‘online’ lalu nadai begunaka peresa pengerai dikena ngesahka pematut ba pekara nya.
Peminta ba MySalam ulih digaga nengah ‘online’ ba https://www.mysalam.com.my/b40/info/?url=main_BM.