MIRI: Atur program Info on Wheels (IOW) ti ditumbuhka Opis Pemadah Malaysia nya entara siti chara ti manah diambi perintah dikena mutarka sesebengkah penerang ti bedau tentu pengamat ngagai mensia mayuh bekaul ba sekeda isu.
Senator Alan Ling madah, program tu ngembuan tanggungpengawa ti besai dalam nagang rayat Malaysia ti mudah napi inovasyen teknologi diatu baka internet, ari ti mudah pechaya ba sebarang berita baru.
“IOW iya nya siti ari inisiatif opis perintah kelebih agi Opis Pemadah Malaysia dikena meri penerang ngagai mensia mayuh ngambika orang nerima penerang ti betul, amat sereta engkeman ti nadai dikuasa penerang baru ari internet, WhatsApp, Facebook sereta ke bukai,” ku iya madah ngagai pengarang berita pengudah dikerandau maya program IOW ke diatur Opis Pemadah Miri di Pasar Malam Saberkas enggau Palan Komersial Saberkas ditu kena Hari Empat.
Ku Ling, entara sekeda isu ke alai rayat patut meretika nya bekaul enggau e-Tunai Rakyat, mySalam, Peka B40, i-Suri, Rabies enggau pekara ke baru diatu, sentang isu koronavirus 2019 (Covid-19) ti majak ngirauka rayat Malaysia.
Iya madah program nya beguna amat dikena mandangka pengereja pengawa enggau ketuai perintah seruran begulai enggau rayat meri penerang sereta nanggam kaul ti manah entara sida.
“Opis Pemadah nya menijar maket ngagai perintah diatu. Aku ngarapka sida regas bejalaika tanggungpengawa bejalai betemu mua enggau mensia mayuh lalu nyadung semua polisi pemadu baru ngagai rayat.
“Tu beguna amat diatu ke alai kitai mayuh ninga berita selebubu ngapa, lalu tu mih penguji ba kitai, Nya kebuah, kitai patut betemu betunga mua laban nya beguna amat,” ku Ling.
Naka diatu, lebih 50 program IOW udah dipejalaika di Miri kenyau nya udah ditumbuh lalu nerima sambut ti manah, ku iya.