KUCHING: Majlis Tindakan Pembangunan Negeri Sarawak (MTPN) nyirika Penyelaras Parlimen (PP) ti nyadi pengari perintah besai ba sitak parlimen ti diarika penyakal di nengeri tu.
Menteri Kereja Raya, Baru Bian madahka, bisi 19 iku PP dichirika ti deka ngenukuka program enggau projek ari baruh Langgur Pemansang Lima Taun Perintah Besai dipejalaika nitihka diperambu.
Iya madahka PP tu deka ngarika perintah Pakatan Harapan (PH) meri kelala enggau bejalaika polisi perintah besai ba sitak parlimen ti diarika kaban parlimen penyakal kelimpah ari ngerapitka kaul entara perintah enggau rayat.
“Kami semina nyirika Penyelaras Parlimen ba sitak parlimen ti diarika penyakal iya nya sitak parlimen ke endur PH alah maya pengawa bepilih besai suba (PRU14).
“Tanggungpengawa Penyelaras Parlimen deka nentuka semua projek dipelanja perintah besai ba nengeri Sarawak dipejalaika sereta diasaika rayat ba renggat baruh.
“Naka ke diatu bisi tiga raban ti nyadi pengari ditumbuhka kami ba Sarawak, keterubah iya nya Majlis Pengurusan Komuniti Kampung Persekutuan (MPKKP), kedua Komiti Harapan Malaysia tu ditumbuhka Opis Menteri Komunikasyen enggau Multimedia enggau ketiga tu (Penyelaras Parlimen),” ku iya ti mega Chairman Majlis Tindakan Pembangunan Negeri Sarawak (MTPN) ungkup perintah besai.
Baru mansutka pekara nya dalam aum pengarang berita Majlis Penyerahan Watikah Penyelaras Parlimen Negeri Sarawak ti diatur ba sebuah hotel ditu, kemari.
“Ba aku tu ngayanka pengeran perintah besai diatu deka mantu enggau nentuka polisi enggau program pemansang kitai ti difokuska ba nengeri Sarawak dipejalaika.
“Kami deka nentuka rayat Sarawak enda tinggal ari segi pemansang lebih agi projek ti diungkupka ngagai nengeri tu ari perintah besai,” ku iya.
Kaban Parlimen Selangau nya dulu ari nya madahka isu ti ditapi rayat deka dibantai sereta dibai nengah PP ti deka megai tanggungpengawa nyadi raban ti bnyadung sereta bejalaika projek ti ditetapka dikena nangkup peminta sereta guna rayat.
Tu mega nyengkaum kena meransang rayat ngambika sama ngambi bagi dalam perambu enggau pejalai projek ba endur nya, ku iya.
“Penyelaras Parlimen ti ngarika sitak parlimen sida, deka nerima Ungkup Belanja Khas Menteri Besai sepenyampau RM500,000 setaun, ti semina dikemendarka Ketuai Direktor Unit Penyelarasan Pelaksanaan, Opis Menteri Besai (ICU JPM) enggau Direktor Pemansang Nengeri.
“Nitihka pinta YAB Menteri Besai, ungkup belanja khas tu patut dikena semanjai taun. Ungkup belanja tu iya nya duit mensia mayuh sereta enda tau enda nitihka garis lalau ti ditetapka,” ku Baru.
Entara Penyelaras Parlimen ti dichiri ngarika perintah PH iya nya Jaziri Alkaf Abdillah Suffian ba sitak parlimen Santubong; Nurhanim Mokhsen (Petra Jaya); Jemree Sabli (Kota Samarahan); Reginald Abell Gaok (Serian); Jamilah Baharuddin (Batang Sadong); Abg Zulkipli Abg Engkeh (Batang Lupar); Norina Umoi Utot (Sri Aman); Noel Changgai Bucking (Betong); Dato Sri Abang Aditajaya Abang Alwi (Tanjong Manis); Andri Zulkarnaen Hamden (Igan); Chen Nguk Fa (Kanowit); Abdul Jalil Bujang (Mukah); Tengku Gruna (Kapit); Abun Sui Anyit (Hulu Rajang); Kilo Lutan (Bintulu); Ibrahim Mohamad (Sibuti); Roland Engan (Baram); Edward Bulot Yakut (Limbang) enggau Zehegkiel Piree nyadi Penyelaras Parlimen sitak parlimen Lawas.
Kelimpah ari nya Baru madahka MPKKP dipelabaka deka dipenyadika iya empu ba pun bulan Mac sereta naka kediatu bisi 3,900 MPKKP di nengeri tu.
Sama bisi datai ba pengerami nya Sapit Chairman Majlsi pimpanan Negeri (MPN) PKR Sarawak Baharuddin Mokhsen sereta kebukai.