Anda di sini

Pengawa ngemanah tauka nyeruri sekula repuk mesti diteruska: Baru

Advertisement

KUCHING: Pengawa ngemanah tauka nyeruri sekula ke udah tuai sereta repuk di Sarawak patut terus dipejalai.

Menteri Kereja Raya Baru Bian madahka, taja pan enda setuju enggau langgur penemu perintah nengeri ngambika nutup lalu ngempuruka sekula ke mimit nembiak tang nya enda patut nyadika tegal pengawa ngemanah tauka nyeruri sekula ke udah tuai sereta repuk enda dipejalaika.

“Bepelasarka prinsip nya aku enda setuju (nutup lalu ngempuraka sekula mimit nembiak), enti endang amat enda tau enda, mesti bisi berunding tauka dipesetuju apai indai nembiak ti kena empas polisi tu.

“Pengawa ngemanah tauka nyeruri sekula nya enda tau enda dipejalaika, taja pia nya nitihka timpuh ke patut laban nya deka nengah beberapa proses.

“Aku ngasaika (langgur penemu) nya enda patut nyadi kebuah nangguhka pengawa ngemanah tauka nyeruri sekula nya lebih agi ke nadai kena empas ari langgur penemu nya,” ku iya.

Baru ditanya sereta nerangka pekara nya dalam aum pengarang berita Majlis Penyerahan Watikah Penyelaras Parlimen Negeri Sarawak ti diatur ba sebuah hotel ditu, kemari.

Iya madahka isu sekula tuai sereta repuk nya isu ti lama udah nyadi, sebedau Pakatan Harapan nyadi perintah besai.

Baka ti dipadahka dalam Kunsil Nengeri ku Baru, ba Sarawak bisi urung 1,400 buah sekula ti udah tuai sereta kelalu jai tauka repuk.

Bekaul enggau nutup lalu ngempuruka sekula ti mimit nembiak, Baru madahka nya deka meri pemar ngagai nembiak ti agi biak umur jauh ari kandang menua sereta bemalam ba sekula.

“Aku datai ari genturung pendiau, aku datai ari menua pesisir, sereta bisi peneleba nemu pemar ti ditapi sekula menua pesisir.

“Enti ulih sekula nya (mimit nembiak) patut ditanka, enti amat enda tau enda dikereja, mesti berunding enggau apai indai nembiak ti kena empas langgur penemu tu,” ku iya seraya madahka perintah tauka kabinet chukup beratka pekara nya.

Bepelasarka ripot berita kemari, Menteri Wang Lim Guan Eng madah ungkup belanja RM400 juta ba taun 2020 ti diungkup khas dikena melanja projek sekula tuai sereta kelalu jai tauka repuk di Sarawak enda patut dikena ngaga sekula baru.

Iya madahka ungkup belanja enda tau dikena nutup enggau nyampurka beberapa buah sekula ti enggau tuju ngaga sebuah sekula baru baka ti diperambu Opis Pelajar Nengeri taun nyin kemari.

“Semua pemendar ti dipinta ari Opis Menteri Wang udah dipejalaika sereta  bepanggai ngagai ejensi teknikal ti bekaul ngereja enggau ngenyampatka pengawa ngemanahka sekula tuai sereta kelalu jai tauka repuk di Sarawak,” ku iya nengah siti penerang, ensanus.

Lim madah, Opis Menteri Wang udah ngenukuka bisi nerima bayar kedua bayar pulai baru duit jali sepenyampau RM350 juta ari perintah nengeri Sarawak kena 6 Februari 2020.

Bekaul enggau laluh 16 buah sekula agi udah ditangguh, iya madah nya dikena meri awak ngagai Opis Menteri Pelajar Malaysia (KPM) enggau Opis Kereja Raya (JKR) Sarawak  mansik baru skop enggau ungkus bejalaika projek nya.

Ku iya dipelabaka pengawa bejalaika sekula nya deka ditinda ba bulan Mac 2020.

“Tu ditangguh mega ketegal perambu deka nutup lalu ngempuruka beberapa buah sekula primari sereta numbuhka sebuah sekula baru, ti enda dipesetuju Opis Menteri Wang (MOF) enggau Opis Menteri Kereja Raya,” ku iya.

Iya madahka, perambu ngempuru tauka numbuhka sekula gempuru tu dikeirauka deka nutup sekula ti semak enggau palan pengentap pendiau raban bansa lalu ngaga sekula baru ba endur baru ti jauh agi.

Ku iya, nya deka ngujungka bisi nembiak tinggal pelajar ketegal isu rumah ti jauh sereta ungkus perengka pengangkut ke dikena ngagai sekula nya mar agi.

“Nya alai, perambu nutup sekula enda dipesetuju sereta patut dikena ngemanahka sekula ke udah bisi ti enda ngira pemayuh nembiak,” ku iya.

Advertisement