KUCHING: Pengawa ngatur kus enggau latih beguna amat dikena nentuka organisasyen seruran relevan napi pemar pemansang global enggau nambahka penemu sereta pengelandik pengereja pengawa.
Sekretari Perintah Nengeri, Datuk Amar Jaul Samion madah, baka program ti diatur Institusyen Pansik Tanah Kerapa Tropika (TROPI) ti beratka ngagai lima batang pekara iya nya Penau Diri, Model Mental, Bekunsi Visyen, Belajar Chara Tim enggau Sistem Pikir ulih ngenegapka penemu runsing sereta pengelandik pesereta.
Berebak enggau nya, iya ngansak bala pesereta ngena penemu enggau pengelandik ti diulih sida ari kus nya ba pengawa ninting hari sida.
“Ari nya, tu ulih nentuka kuing organisasyen ba tikas ti pemadu manah bejalaika servis ngagai rayat.
“Nya kebuah, nama utai ti digaga kita ditu patut dikemeran lalu guna nya maya bejalaika pengawa kita semua,” ku iya.
Iya mdah munyi nya lebuh bejaku ba pengerami ngelanjar program lima hari, ‘Personal Mastery and Tram Effectiveness’ di TROPI ditu malam Hari Empat.
Nangkanka nya, Jaul nyemetak madah, nguasa penemu enda chukup enti nya nadai disikap enggau pengelandik megai organisasyen mansang ke mua.
Ku iya, ubah nyadi dalam enviromen ti seriris enggau pemar ti baru ngagai semua organisasyen.
Ku iya nambah, tu begunaka sistem engagu struktur organisasyen ti patut diperatika belama dikena nentuka nya seruran relevan sereta sinamik.
Bisi organisasyen, ku iya, nadai mujur nyapai misyen enggau visyen sida laban nadai ngemeranka sistem sereta proses ti manah dikena nentuka penegap nya.
Ba awak ke sama, iya meri puji ngagai TROPI ti udha mujur bulih pemujur ba renggat nengeri, menua enggau antarabansa.
“Aku gaga ulih meda TROPI ngerembai besai dalam mungkur pengawa enggau penyulut ba renggat global ti udah diberi tanda basa,” ku iya.
Program nya berengkah dipejalaik 17 Februari nyin tadi nyengkaum dibantu 26 iku pengereja pengawa.
Sama bisi datai iya nya Direktor TROPI Dr Lulie Melling enggau pemesai kanan TROPI.