Anda di sini

Kapit bisi ngerikod siti kes keterubah PUI COVID-19

Advertisement

KUCHING: Bagi menua Kapit bisi ngerikodka kes keterubah orang ti dipelaba kena rampit (PUI) COVID-19 ari semua lima kes PUI baru ti bisi diripotka ba Sarawak kemari.

Sekreteriat Komiti Ngatur Penusah Ngenyit Nengeri (JPBN) Sarawak nengah penerang media madahka, kes nya dirikodka ba Sepital Kapit, lalu nangkanka nya tiga agi kes PUI ba Sepital Bintulu sereta siti kes ba Sepital Besai Sarawak (HUS).

“Enggau kes baru tu, kenyau ari 10 Januari nyentukka sehari tu (kemari), penyampau semua iya nya 107 kes PUI.

“Taja pia, 99 kes PUI ti diuji ba makmal ditemu negatif lalu lapan kes agi nganti pemutus peresa makmal,” ku penerang nya.

Beserimbai enggau nya, nitih ku penerang JPBN Sarawak, siku peranak ari menua China ti diperubat ba Sepital Bintulu entara lapan kes PUI ti agi nganti pemutus peresa makmal nya.

Opis Pengerai nyentukka diatu udah meresa 11,534 iku temuai ti datai ari bemacham pintu penama ke nengeri tu ti ngaul nengah penerebai bilun, tasik enggau darat naka pukul 11 pagi kena Hari Empat tu tadi.

Nitih ku penerang nya, nyentukka diatu bisi 152,473 iku temuai ti datai di nengeri tu udah diperesa kenyau ari 1 Februari tu tadi.

Advertisement