MIRI: Penumbuh galeri ti meri penerang sentang program pemereti ati bekaul enggau penyakit mental ulih ngurangka stigma, salah runding sereta peragam negatif ngagai individu ti napi penyakit tu.
Datuk Bandar Miri Adam Yii Siew Sang madah, kelimpah meri penerang kebendar sentang penyakit mental, program pemereti ati nengah galeri tu ulih nyadung penerang ti betul sentang penyakit mental ngagai mensia mayuh ke alai nya ulih diputarka nengah chara berubat.
“Program pemereti ati bansa tu ulih ngangkatka peluang penyakit tu diputarka ba renggat tumu lalu ulih ngeraika jampat,” ku iya maya bejadika ‘Galeri Minda’ di Rumah Kenyalang, Lot 13 Kuarters Perintah Tanjung Lobang ditu ensanus.
Iya mega muji pengawa ti dipejalaika Gerempung Pengerai Mental Miri nyentuk ditumbuhka ‘Galeri Minda’ ba ditu.
Berebak enggau nya, Adam mega meransang komuniti di Miri baka sekula enggau gerempung datai nemuai ngagai palan informasyen sentang penegria mental tu.
“Aku gaga meda Gerempung Pengerai Mental Miri siti organisasyen volunteer ti ngembuan kordinasasi ti manah enggau opis perintah baka Opis Pengerai Sarawak kelebih agi Opis Psikiatri enggau Pengerai Mental, Opis Pengintu Pengelantang Mensia Mayuh enggau sektor peribit.
“Nengah kordinasi ti manah tu, sida ulih meri kaunseling enggau nyadung penemu ti berega sereta servis komuniti ngagai sida ti bisi penusah sekalika pesakit tauka orang ti nyaga.
“Ari pengawa bekunsi manah tu, tiap iku ari kitai ulih mantu dalam nentuka sida ti bisi napi penanggul bekaul penyakit mental tu ulih beinsur idup manah agi,” ku iya.
Sama bisi datai, Direktor Sepital Miri Dr Jack Wong Siew Yu engagu Ketuai Opis Psikiatri enggau Pengerai Mental Sepital Miri Dr Bawih Inu Pu’un.