KUCHING: Lembaga Pelesenan Kenderaan Perdagangan (LPKP) Sarawak sedia mantu perintah nengeri nyema bisi sebarang ubah ba pinta enggau penetap ba peminta lisin ungkup program bas sekula enda bebayar.
Chairman LPKP Sarawak ke baru, Wong King Wei madah iya empu komited mantu ngambika inisiatif perintah Sarawak nya ulih dipejalaika.
“Seagi nadai ngelanggar sebarang pinta enggau penetap ba lisin bas sekula ke diatu,kami ngalaluka nya.
“Enti bisi sebarang ubah (ba pinta enggau penetap ) lisin baru aku sedia mantu lalu LPKP tentu deka ngemudahka nya,” ku iya ba aum media pengudang mendingka penerang ba hari keterubah iya ngeripot diri nyadi chairman LPKP Sarawak ba opis LPKP ditu, kemari.
Wong ke mega Kaban Kunsil Nengeri Padungan madah, ke diatu nya nadai nyadi penanggul ba LPKP laban pengemeran dagang bas sekula nadai minta lisin baru.
Taja pia, iya pechaya bas sekula mega bisi sekeda atur ti ditetapka nyadi pinta enggau penetap maya ngeluarka lisin.
“Enti bisi ubah sekeda ba pinta enggau penetap syarat ba bas sekulanya mesti dipejalaika nengah chara ke lebih sah.
“Aku ngelaluka nya lalu diatu nadai kaul enggau LPKP laban sida nadai minta lisin baru,” ku iya.
Ku iya, sesapa ke sanggup mantaika diri enggau program ke meri pemaik ngagai rayat, nya enda amat diperansang.
“Aku meda tu siti program ke manah lalu diatu nadai kala disebut nyadi isu ba LPKP laban sida ngena lisin bas sekula ke endang udah bisi,” ku Wong.
Berebak enggau nya, servis bas sekula enda bebayar ba empat mengeri besai di nengeri tu deka berengkah bulan April tu ila.
Kepala Menteri Datuk Patinggi Abang Johari Tun Openg apin lama udah madahka pekara silih sentang servis bas sekula enda bebayar nya nya udah tembu lalu perintah nengeri begunaka RM4 juta dikena ngemujurka inisiatif nya.
Sama bisi datai, Penulung Direktor LPKP Sarawak Abang Zulkarnain Abang Ibrahim enggau MP Bandar Kuching, Dr Kelvin Yii.