KUCHING: Perintah nengeri udah ngemendarka belanja sepenyampau RM50 milion taun tu dikena ngemanahka agi tauka ngaga rumah panjai.
Sapit Kepala Menteri, Datuk Amar Douglas Uggah Embas madahka Kepala Menteri Datuk Patinggi Abang Johari Tun Openg ngemendarka penyampau belanja nya kenyau ari perintah besai ke patut nyendiaka belanja nya ti enda agi nyendiaka taun tu.
“Ungkup belanja nya deka meri penguntung tauka pengelantang ngagai 1,667 pintu/ruang bilik enggau bantu maksimum sepenyampau RM30,000 ke tetiap pintu,” ku iya nengah penerang berita.
Uggah madahka pekara nya pengudah nyadi chairman aum ti ngaga pemutus penerima ti bulih penguntung ari program nya,kemari.
Nitihku Uggah, kenyau ari taun 2007 perintah besai udah meri ungkup sepenyampau RM122.3 milion dikena bejalaika program nya.
Ari penyampau belanja nya (RM122.3 milion), udah meri penguntung ngagai 3,432 pintu ari 163 buah rumah panjai.
Taja pia, ba taun 2016 penyampau ungkup belanja ari perintah besai dikurangka ari RM50 milion ngagai RM10 milion ninting taun ba taun 2018 enggau 2019 taja pan peminta ari peranak rumah panjai nambah ninting taun.
Sama bisi ba aum nya, Menteri Kaunsil Kandang Menua enggau Pengawa Berumah Dato Sri Dr Sim Kui Hian, Menteri Muda Kaunsil Kandang Menua enggau Pengawa Berumah Datu Dr Penguang Manggil, Menteri Muda ba Opis Kepala Menteri (Undang-undang enggau Adat Bumiputera) enggau ke bukai.