KUCHING: Penerang ke diulih ari pengawa Ngitung Penyampau Tubuh enggau Genturung Berumah 2020 ti bisi bukti nyata amat beguna dikena perintah bejalaika perambu, intervensyen enggau ngaga polisi.
Menteri Pengintu Pengelantang Pendiau, Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah madah, nya alai kerejasama ari rayat nengeri kelebih agi ke diau di mengeri ngagai Opis Ngitung Penyampau Tubuh Malaysia (DOSM) ti bejalaika pengawa Ngitung Penyampau Tubuh enggau Genturung Berumah 2020 (Banci 2020) berengkah 7 Julai 2020 beguna amat.
Ku iya, asil ari ngintung penyampau tubuh nya deka dikena perintah ngelanggur pemansang menua tauka nengeri.
“Aku minta mensia mayuh meri kerejasama ngagai orang ke ngintung penyampau tubuh ti endang dilatih khas Opis Ngitung Penyampau Tubuh (DOSM) tu, maya sida bejalaika pengawa nya.
“Kitai nemu kelebih agi ba mengeri besai ari sukut senario kekadang orang nangi deka muka pintu (tauka meri kerejasama), nya kebuah penerang bekaul enggau ngitung penyampau tubuh ti deka berengkah dipejalaika 7 Julai 2020 dikerembaika diatu ngambika mensia mayuh nemu.
“Penerang ke diulih nengah proses ngitung penyampau tubuh tu beguna amat ngagai perintah ke nyadi pengaga polisi, tu deka nyadi pelasar ngagai kami (perintah) ngaga polisi,” ku iya seraya madah nya alai amat begunaka kerejasama mensia mayuh.
Fatimah mansutka pekara nya dalam aum pengarang berita pengudah iya nerima penemuai basa sereta mendingka penerang ari raban DOSM Sarawak bekaul enggau Ngemujurka Pengawa Ngitung Penyampau Tubuh enggau Genturung Berumah 2020 (Banci 2020) ba Bilik Baum Opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit ditu, kemari.
“Tu (asil ngitung tubuh) mega meri penerang ngagai kitai dini tikas kitai diatu, lalu ari tu kitai ulih ngaga perambu, intervensyen sereta polisi ke deka digaga ngambika juluk perintah ngemansangka Sarawak ulih dijapai.
“Tu senipak amat enggau rambai jaku (Banci 2020) ‘Data Anda Adalah Masa Depan Kita’, laban nengah data tu kitai ulih ngadu perambu, intervensyen, ungkup belanja enggau betul sereta ke bukai,” ku iya seraya madah laban tubuh ke diitung nya meri bukti nyata.
Bejaku baru, Fatimah madahka dikena nyeliahka pengirau enggau pengelikun diri, mensia mayuh tau ngenukuka orang ke ngitung tubuh nya nengah surat kuasa, landyard enggau tag nama, ti nunjukka sida nya diberi kuasa bejalaika banci.
Dulu ari nya, Sapit Direktor DOSM Sarawak Dayang Rozana Abang Hassan madahka pengawa banci ti dipejalaika pengelama tiga minggu berengkah 7 Julai tu ila, setipak enggau Resolution on 2020 World Population & Housing Censusu Programme ti disetuju United Nation Economic and Cosial Council (UN ECOSOC) kena 10 Jun 2015 ti deka nentuka nengeri bejalaika pengawa ngitung tubuh dalam timpuh 2015-2024.
Bisi lima buah menua ti bejalaika pengawa ngitung tubuh dalam taun 2020 iya nya Malaysia, USA, China, Indonesia, Argentina enggau Ghana, ku iya.
Projek Ngitung Penyampau Tubuh 2020 ku Rozana, iya nya projek besai ti mungkur mayuh bengkah ejensi enggau prosedur sereta nyengkaum tetiap individu enggau alai endur diau (TK) di serata menua.
“Sekali tu bisi lima chara bejalaika pengawa ngitung tubuh iya nya e-CENSUS ti dikena responden, Computer Assisted Personal Interview (CAPI) ti dikena orang ke ngitung penyampau tubuh, Computer Assisted Telephone Interview (CATI) ti dikena CATI Caller iya nya Pemesai Tetap DOSM Nengeri, Paper Assisted Personal Interview (PAPI) ti dikena orang ke ngitung tubuh enggau chara Drop Off and Pick Up (DOPU) ti dikena responden,” ku iya.
Batang tuju pengawa ngitung penyampau tubuh 2020 ti ngena chara iya nya dikena ngulihka stok enggau profil peranak enggau genturung berumah ti komprehensif enggau silik nyentuk ke renggat geografi pemadu mit ti nyadi benchmarking ngagai gaya demografi enggau sosio-ekonomi peranak menua, ku iya.
Pengawa ngitung tubuh tu mega deka nyadi pelasar anggar sereta penyampau peranak enggau endur diau, ku iya, kelimpah ari nyadi pelasar kelai ba pengawa nyendiaka indikator sosio-ekonomi.
“Objektif ngitung tubuh tu mega nyadi input perambu pemansang menua nyengkaum ngagihka perkapita baka ti bisi tauka dituliska dalam konstitusyen,” ku iya seraya madah pengawa nya dipejalaika 10 taun sekali lalu Pengawa Ngitung Tubuh 2020 iya nya ti ke-6 dipejalaika kenyau ari Malaysia ditumbuhka.
Banci 2020 ku iya ngena Chara De Jure, penerang tetiap iku peranak ke digumpul nitihka endur diau.
Bisi ba aum pengarang berita nya kemari, Penulung Direktor DOSM Sarawak Siti Erfina Kadri sereta penulung Direktor DOSM Sarawak Zainal Abidin Abd Mutalib enggau sida kebukai.