Anda di sini

Sarawak deka mantu menua China mutarka penyakit COVID-19

Advertisement
 Abang Johari betabi enggau kaban serakup raban bansa China ti ngelalu penatai iya ngagai pengerami Makai Lemai Penumbuh Ke-41 Taun enggau Tahun Baru China 2020 Federasyen Serakup Raban Bansa China Bagi Menua Kuching, Samarahan enggau Serian.
SELAMAT DATAI: Abang Johari betabi enggau kaban serakup raban bansa China ti ngelalu penatai iya ngagai pengerami Makai Lemai Penumbuh Ke-41 Taun enggau Tahun Baru China 2020 Federasyen Serakup Raban Bansa China Bagi Menua Kuching, Samarahan enggau Serian.

KUCHING: Sarawak lantang ati enggau pengelurus perintah menua China mutarka isu penyakit COVID-19.

Kepala Menteri Datuk Patinggi Abang Johari Tun Openg madah, Gerempung Pengerai Sedunya (WHO) mega muji pengawa ti udah digaga perintah menua China.

“Aku mega deka meri terima kasih ngagai raban bansa China di Sarawak laban udah meri bantu ngagai perintah menua China.

“Aku deka mai pekara tu ngagai kabinet lalu bakani kitai ulih mantu perintah menua China ba isu tu,” ku iya.

Iya madah munyi nya maya ke bejaku ba Pengerami Makai Lemai Penumbuh Ke-41 Taun enggau Taun Baru China 2020 Federasyen Serakup Raban Bansa China Bagi Menua Kuching, Samarahan enggau Serian ke diatur ba sebuah hotel ditu, kena Hari Minggu nyin tadi.  

Tambah Abang Johari, semua perintah bisi kena empas ketegal COVID-19 nyengkaum Malaysia.

Taja pia ku iya, Sarawak chukup benasit laban perintah nengeri bisi meri sepenyampau belanja dikena merangsang ekonomi nengeri.

“Kami melabaka ekonomi nambah ngagai lima nyentuk ke enam peratus di Sarawak nengah belanja ke diberi ungkup pemansang nya. Nya kebuah kitai semina ngasaika mimit aja empas ketegal virus tu,” ku iya.

Abang Johari ngarapka penyakit COVID-19 ulih jampat dipunaska di serata dunya ukai aja ketegal sinu ke rayat menua China tang mensia di serata dunya.

Kena mantu menua China mutarka COVID-19, Federasyen Serakup Raban Bansa China Bagi Menua Kuching, Samarahan enggau Serian mega bisi nyuaka bantu RM107,500 ngagai perintah menua China asil ke digumpul ari mayuh bengkah organisasyen enggau serakup China di Kuching.

Bantu nya disuaka ngagai Sapit Konsul Jeneral Republik Rakyat China di Kuching, Zhang Yang ti ngarika perintah menua China.

Sama bisi datai, Menteri Kaunsil Kandang Menua enggau Pengawa Berumah Dato Sri Dr Sim Kui Hian, Presiden Federasyen Serakup Raban Bansa China Bagi Menua Kuching, Samarahan enggau Serian, Dato Richard Wee.

Advertisement