Anda di sini

Penguang gaga ati laban Rh Jelaping nyadi Rumah Panjai Chunto di Marudi

Advertisement
 Penguang nerima tepa ari TR. Jelaping Jali lalu dikemataka Datin Monica Ukong.
TEPA: Penguang nerima tepa ari TR. Jelaping Jali lalu dikemataka Datin Monica Ukong.

MARUDI: Menteri Muda Kaunsil Kandang Menua, Datuk Dr. Penguang mantaika pengaga ati iya ngagai 33 pintu Rumah Jelaping VSDC di Sg Arang B ke mega ulih nyadi Rumah Panjai Chunto di Marudi laban rumah panjai nya udah mujur numbuhka Seksyen Raban Nembiak, Volunteer Bomba, Seksyen SIDS enggau seksyen bukai tambah mega rumah panjai tu bisi insentif kediri empu, proaktif sereta bisi Kort Futsal kediri. Aku meri puji ngagai ketuai raban nembiak sereta meri tabi basa ti besai ngagai iya enggau bala komiti.

Jaku pengaga ati tu datai ari Datu Dr. Penguang lebuh iya bejaku ba pengawa ngelancharka dua program dalam siti pengerami ti bejadika Balai Mayuhguna enggau Kort Futsal rumah panjai nya pagi kemari.

Penguang ke mega Kaban Kunsil Nengeri (ADUN) Marudi madah, Kort Futsal nya beungkus sepenyampau RM100,000 nengah geran ari Kaban Parlimen (MP) Baram Anyi Ngau lalu ungkus ngaga Balai Mayuhguna iya nya RM250,000 enggau atap ari baruh projek transformasyen menua pesisir (RTP) iya lalu penyampau belanja beungkus RM106,000 dikena projek ungkup ngemanahka jalai Sg Arang A ngagai B ke alai ungkus nya sepenyampau urung RM900,000. Kelimpah deka nyambung bekal elekterik ari grid dikena mekal kuasa ngagai Sistem Ai Beresi Sg Arang ke udah dipejalaika opis JBALB.

Penguang mega madahka penerang ke alai aku nadai kala nerima 20 peratus ari penyampau belanja projek ti diberi aku nya laban nya ukai gaya aku, nya projek ungkup rayat. Nya kebuah kunteriktor ti ngaga projek Balai Mayuhguna iya nya kunteriktor Anak Banyok nadai siti pan aku bulih ari nya, ku iya.

Iya mega nerang chara ba pemilih chalun tauka chalun milih kaban kunsil kandang menua tu, chalun kaban kunsil deka dipilih pengari parti politik enggau ti disadang Opis Menteri Kaunsil Kandang Menua sereta mega sentang pengawa nyiri ketuai ti udah dichiri perintah nengeri dikena nentuka sapa ti tau mangku pengawa nya.

Mayuh orang udah mantah sereta belaya enggau pangan diri ketegal ti enda sama chalun parti politik.

MPKKP enda dikemendar ditumbuhka ba sebarang rumah panjai di Sarawak ke alai kitai endang udah bisi Komiti Pemansang enggau Pengelikun Genturung Pendiau (JKKK) pia mega tanggungpengawa nya lebih kurang sebaka enggau JKKK ari baruh pegai Opis Pelilih lalu nuan meri minit aum ngagai opis pelilih dikena berundingka nya.

Ba pengerami nya, Datu Dr Penguang mega bisi meri RM5,000 ngagai tiap seksyen SIDS Rumah Jelaping enggau Rumah Asi Sayun di Sg Arang A.

Sama bisi datai iya nya Sekretari Politik Kepala Menteri, Robert Ayu, Pemesai Pelilih Beluru, Alfred Geling, Chairman MDC, Edward Mendai, Pemancha Enggah enggau Pemancha Randie Bundan sereta sekeda bala Penghulu.

Advertisement