SIBU: Kaul ti manah ari semua pupu raban bansa di nengeri tu patut dipajak lalu diterenak nembiak rebak dudi, dikena nyaga pengelikun sereta ke pemaik Sarawak.
Menteri Muda Pelajar, Sains enggau Pansik Teknologi Dr Annuar Rapa’ee madah, Sarawak ngembuan 17 etnik pupu bansa ti bebida ari sukut adat enggau main asal sereta jalai pengarap patut ngemeranka penyerakup ati enggau pangan diri, ngambika Sarawak nyadi nengeri ke entap sereta likun.
“Kaya bakani pan kitai ba dunya tu, nya nadai reti enti nengeri kitai tu charut tauka enda likun.
“Pekara beserakup enggau pangan diri endang beguna dikena nyamin Sarawak tu nyadi siti nengeri ke nyulut sereta mansang agi dudi hari ila,” ku iya lebuh bejaku ba Pengerami Makai Lemai Taun Baru China diatur Serakup Ketuai Komiti Ketuai Bansa (KMKK) China Pampang Sibu ba sebuah hotel ditu, kilah lemai ensanus.
Sama bisi datai iya nya Residen Sitak Sibu Charles Siaw, Chairman Opis Pelilih Sibu (MPS) Clarence Ting, Chairman Serakup KMKK China Pampang Sibu Temenggong Dato Vincent Lau, Temenggong Datuk Wan Hamid Edruce Tuanku Mohamad, Temenggong Stanley Gramong sereta raban temuai ke bukai.
Dr Annuar ke mega Menteri Muda Berumah enggau Pengerai Mensia Mayuh madahka penyulut enggau pemansang Sarawak bepanggai ba jari rayat empu dikena nyura singkang dudi hari ila.
Nya alai, Kaban Kunsil Nengeri Nangka tu madahka semina penyerakup pupu raban bansa aja ulih nentuka Sarawak nyulut ba pemansang.
Bekaul enggau serakup tu, Dr Annuar ngelalau semua raban komiti nya patut mandangka adat beserakup ngagai pangan diri.
“Kita ke nyadi ketuai sereta teleba begulai enggau rayat, KMKK patut bejalaika tanggungpengawa enggau manah ngambika raban nembiak kita nunda sereta ngemeranka ulah kita.
“Begulai sereta ngaul orang bukai ngambika kaul kitai majak mayuh,” ku iya.
Beserimbai enggau tu, iya mega ngansak raban serakup tu seruran bekerejasama enggau pangan diri dalam semua pengawa.
“Anang semina meda asil pengawa raban aja tang nguji begulai sereta bekereja enggau semua pupu bansa ngambi ulih mandangka penyerakup kitai tu ngagai nembiak rebak baru.
“Sarawak enda ulih nyapai penyulut ba pemansang dudi hari ila enti sema kitai enda seati sereta beserakup enggau pupu raban bansa ke bukai ba kandang nengeri tu,” ku Dr Annuar.