Anda di sini

Tentuka pengamat sesebengkah berita sebedau ngerembaika nya ba media rama

Advertisement
 Andrew (empat kiba) ti datai ngulu pengerami ngintu Program ‘Gong Xi Fa Cai @ Komuniti’ ti diatur ba Palan Inovasyen Sarikei (SIC), malam ensana.
NGEREMBAIKA PENERANG: Andrew (empat kiba) ti datai ngulu pengerami ngintu Program ‘Gong Xi Fa Cai @ Komuniti’ ti diatur ba Palan Inovasyen Sarikei (SIC), malam ensana.

SARIKEI: Kaban Parlimen (MP) Sarikei Andrew Wong Ling Biu nyemetak madahka dalam jeman pemansang teknologi ti napi mayuh penguji sereta pemisi konsep ngerembaika berita tauka ‘viral’ dalam media rama diatu, endang mudah ngagai komuniti nerima sekeda penerang tauka berita sentang sekeda isu tauka pekara ti nyadi di menua tu semina ba ujung tunjuk aja.

Taja pia, ku iya, bisi sekeda penerang ti diterima nengah media rama nya lebih agi berita ti semina narit ati aja lalu bedau temu pengamat nya.

“Nya alai, endang beguna bisi pemereti ati ba raban komuniti kitai dikena nentuka dulu pengamat sekeda penerang ti diterima sebedau pechaya sereta ngerembaika nya ngagai orang bukai.

“Berindik ari nya, ditu mih guna tanggungpengawa ‘Komuniti Harapan Malaysia’ (KHM) ti nyadi bakih strategik perintah ke alai kitai ngarapka kaban KHM ulih mantu pengawa ngerembaika penerang enggau polisi perintah ti betul.

“Nyadika jematan ungkup komuniti dalam ngerembaika penerang perintah Pakatan Harapan (PH), pemisi KHM nengah pelasar ti disediaka Opis Pemadah Malaysia nya entara siti inisiatif ti manah laban tetiap kaban KHM tu ulih mantu mai penerang bekaul perintah sereta ngangkatka pengeransing dalam beserakup entara komuniti di kandang menua tu,” ku Andrew.

Iya madah munyi nya ba pengerami bejadi Program ‘Gong Xi Fa Cai @ Komuniti’ ti udah diatur ba Palan Inovasyen Sarikei (SIC), malam ensana.

Pengerami nya diatur Opis Pemadah Malaysia Bagi Menua Sarikei lalu udah digulu urung 120 iku komuniti di kandang menua nya.

Nengah jaku pengelalu iya mega, Andrew bisi madah, rayat Malaysia seruran ngemeranka penyerakup sereta runding talukka menua ungkup pengelantang begulai, kelimpah ulah kitai semua nyadi rayat Malaysia patut terus ditegapka agi.

“Kebendar aktiviti bansa tu endang engkeman enggau batang tuju program tu ti deka ngenegapka penyerakup, pengelikun enggau pengelantang rayat ti datai ari pupu raban bansa, jalai pengarap enggau adat nengah pejalai raban volunteer iya nya KHM ti diatur Opis Pemadah Malaysia.

“Endang ngena ungkup kitai bela nyungkak runding talukka menua lalu kitai pechaya siti chara dalam nentuka tu iya nya nengah media rama enggau bekunsika pekara positif ti ulih meransang asai sayauka menua sereta nerenakka penyerakup dalam pengidup kitai besehari-hari.

“Adat ti bela bebasaka pangan diri entara siti bansa enggau bansa bukai sereta entara jalai pengarap ti bemacham meseti terus diteguhka agi ba pengidup dalam komuniti,” ku iya.

Ku Andrew nambah, nyadi rayat Sarawak sereta peranak Malaysia seruran ngembuan runding ti rasional dalam nama pan pengawa kitai ba konteks pengelantang rama.

Sama bisi datai ba pengerami nya Direktor Opis Pemadah Malaysia Nengeri Sarawak Haji Suwadi Haji Guliling, Sapit Direktor Opis Pemadah Sarawak Aziz Abdul Rahman enggau Ketuai Penulung Direktor Ajes Tuah.

Advertisement