LIMBANG: Sarawak terus tegap ari sukut politik, enggau penatai pemisi ti diatur enggau manah sereta terus matak pemeranak puku domestik enggau menua luar ari baruh pegai perintah Gabungan Parti Sarawak (GPS).
Menteri Muda Betanam Betupi Moden, Tanah Adat enggau Pemansang Kandang Menua Sarawak Datuk Dr Abdul Rahman Ismail madahka polisi kemerah dagang kelimpah ari pengulih dalam nyendiaka infrastruktur pemun di kandang mengeri enggau menua pesisir ngayanka Sarawak ulih ngatur ekonomi enggau manah.
Ku iya madah, penegap politik enggau ekonomi ti dikemeranka Sarawak nyadika nengeri tu mansang agi dibandingka enggau nengeri bukai di Semenanjung Malaysia.
“Sarawak nyentukka diatu mujur diatur enggau manah ari perintah ti dipegai kediri parti ti bepelasarka Sarawak, iya nya GPS,” ku iya bejaku maya pengerami Pemesai Begulai enggau Rayat diatur Palan Servis Komuniti Kunsil Nengeri (DUN) Bukit Kota sereta pengawa nyuaka geran perintah ba Balai Bunga Raya ditu, kemari.
Sama bisi ba pengerami nya Residen Bagi Menua Limbang Aspalela Sahmoni, Pemesai Pelilih Limbang Superi Awang Said enggau ketuai ejensi perintah ke bukai.
Iya ke mega ADUN Bukit Kota madahka Sarawak mujur ngatur nengeri tu enggau manah nyentukka pekara nya udah diaku Menteri Besai empu iya nya Tun Mahathir Mohamad.
Pia mega, ku iya nambah, perintah Sarawak sama bisi bejalaika sekeda polisi ti bepelasarka rayat nengah meri mayuh macham bantu ngagai raban ti beguna, entara nya nyengkaum pemaik ari Kenyalang Gold Card (KGC) ungkup orang lunggar umur ti beumur 60 taun ke atas, perintah nengeri mega deka mantu mayar sepenyampau RM5,000 dalam nyendiaka bekal elekterik di rumah panjai enggau genturung pendiau.
Bantu bukai ku iya baka program bekal ai enda bebayar, iya nya perintah nengeri deka mayar RM5 tetiap bil ai ninting bulan ungkup peranak di kandang mengeri enggau menua pesisir, meri RM450 ngagai indai sereta mayuh agi.
Dr Abdul Rahman madah perintah mega enggau naka ulih meri agih belanja sereta geran ti sebela ngagai bemacham gerempung sereta Gerempung Ukai Dikuasa Perintah (NGO) ba pelilih tu dikena sida bejalaika sebarang aktiviti ti pulaika pemaik komuniti.
Ku iya nerang, nyauka 20 bengkah program sereta pengerami besai ti ngaul sektor dagang temuai, lumba enggau main, main asal, betanam betupi sereta program bukai ti narit ati temuai dataika pulau Borneo ke udah dilangkar semanjai taun tu.
Pengawa ngatur program besai tu, ku iya, deka meri empas ti positif ari sukut pengerai tubuh enggau rama, ngenegapka kaul ukai semina entara peranak di Limbang tang mega ngagai bakih bukai ke datai ari luar Limbang.
“Taja aktiviti nya begunaka ungkus tang kitai patut meda ngagai empas positif ngatur sesebengkah aktiviti nya dikena narit penatai temuai luar ke pelilih tu,” ku iya nambah.
Dr Abdul Rahman mega madah pemujur ngatur program tu iya nya nengah kerejasama ari gerempung enggau NGO bukai.
Iya dekaka pemeri agih belanja nya ulih dikena memanah ke pemaik sida ti ngatur aktiviti gerempung.
Ba pengerami nya, bisi 93 penerima ti mungkur mayuh macham gerempung enggau NGO nerima agih belanja sida empu enggau penyampau semua nya RM471,000.