Anda di sini

Kemeratka peranak nengeri tu gawa ba kompeni minyak, gis Kemeratka peranak nengeri tu gawa ba kompeni minyak, gis

 Elias (duduk empat kanan) enggau ke bukai begambar pengudah aum media di Miri, kemari.
NUNTUT HAK: Elias (duduk empat kanan) enggau ke bukai begambar pengudah aum media di Miri, kemari.

MIRI: Perintah nengeri diansak mansik baru polisi sekeda kompeni minyak enggau gis ti beroperasyen di Sarawak ngambika lebih ngemeratka peranak nengeri tu lebuh ke ngambi orang gawa, pia ku Presiden Serakup Dayak Think-Tank Sarawak Elias Lipi Mat.

Iya ngarika beberapa Gerempung Ukai Dikuasa Perintah (NGO) Dayak ba aum media kemari deka ke peluang kereja enggau pangku pengawa dalam kompeni minyak enggau gis diberi enggau lurus sereta enda besiping ngagai peranak nengeri tu.

“Pekara ke baka tu patut dikemeratka kelebih agi ba sekeda kompeni minyak enggau gis ke beoperasyen ditu ngambika meri mayuh agi peluang ngagai peranak nengeri tu abis nadai 70 peratus ungkup pekereja ba renggat ngaduka pengawa enggau pemesai operasyen ba palan kereja.

“Anang semina dikuasa siti bansa aja tauka dikerengkun pekereja ari Semenanjung Malaysia. 70 peratus pekereja nyapatut mungkur pupu bansa ke bisi di nengeri kitai tu,” ku iya.

Ba aum media nya, Elias bela bisi ngenang pasal semilan iku ti diketuka gawa sebuah kompeni minyak enggau gis ke beoperasyen di Bintulu ti nadai enggau kebuah ti tegap sereta patut.

Ku Elias, sida tekenyit sereta asa ati meda ulah opis kompeni nya ti ngetuka semilan iku nya ti nadai meri kebuah nyata.

“Kelimpah ngansak perintah nengeri mansik polisi kompeni minyak enggau gis ke beroperasyen ditu, kami mega minta perintah nengeri nyaup negika sida ti diketu kompeni nye kereja.

“Sida baka ke diguna maya ke bisi guna lalu diketu pia aja enggau nadai kebuah. Tu disemaka baka kitai mai tebu, abis manis lalu dibuai,” ku Elias.

Kelimpah ari nya ku Elias, kompeni minyak enggau gis ti beroperasyen di Sarawak mega patu bisi opis kompeni ditu lalu ukai semina ngiga rayat nengeri tu ke landik gawa tang opis sida di Semenanjung Malaysia.

“Abis nadai ba seksyen ngatur pengawa, kitai tau meri peluang ngagai peranak nengri tu ngambika ngaduka nya. Ukai kitai enggaika pekereja ari Semenanjung Malaysia, tang ke pemadu beguna iya nya ngemeratka rayat diri empu dulu.

“Kami enggaika nasit rayat kitai kelebih agi bansa Dayak terus nyadi baru baka nasit semilan iku nya jemah ila. Nya alai, kami amat ngarapka perintah nengeri nyaup lalu mutarka penanggul tu sereta nyendiaka garis lalau sentang polisi ke patut ngagai sekeda kompeni ke bekaul,” tambah iya.

Sama bisi ba aum media nya Presiden Serakup Iban Sarawak (PAIS) Samuel Suring, MandalPresiden Terabai Menua Ugik Jalit enggau bala pengari ari Serakup Pekereja Minyak enggau Gis Sarawak.

Entara isu ti dibantaika baka gaji laun dibayar ngagai pekereja offshore, penyampau gaji ke be bida dibayar entara pekereja Sarawak enggau Semenanjung Malaysia sama kereja enggau kompeni, isu nyain sempekat ungkup sida ke gawa ke menua tasik sebedau gawa lalu ukai maya gawa enggau isu Opis Imigresyen ke patut patut siru agi ngagai permit kereja.