Anda di sini

IPD Bintulu majak chakah nagang pengawa jai nengah Hari Begulai enggau Mensia Mayuh

 Zulkipli enggau bala pemesai kanan polis betabi enggau bala ketua raban bansa enggau bansa di Kampung Jepak.
KEMERAH: Zulkipli enggau bala pemesai kanan polis betabi enggau bala ketua raban bansa enggau bansa di Kampung Jepak.

BINTULU: Indu Opis Polis Pelilih (IPD) Bintulu majak chakah nagang pengawa jai nengah Hari Begulai enggau Mensia Mayuh di Dewan Mensia mayuh Kampung Jepak, ensanus.

Program nya dipenyadika Kepala Polis Pelilih Bintulu, Superintenden Zulkipli Suhaili disempulang bala pemesai kanan polis Bintulu.

Tuju program baka randau nya dikena ngiri penemu ngagai mensia mayuh, ejensi perintah enggau peribit ngambika tau bekerejasama enggau polis ba pengawa nagang pengawa jai.

Entara ke diberi fokus iya nya mending sereta mutarka sebana mensia mayuh nengah kaunter alai betanya, meransang sereta nempa kerejasama ke manah entara polis enggau mensia mayuh sereta bejaku terus enggau mensia mayuh nengah randau.  

Sekeda isu ti dibantaika iya pengawa salah guna siber tauka nipu nengah siber, licha nagang pengawa jai, negapka komuniti tauka Skim Rondaan Sukarela (SRS) sereta ngiri penemu, sukung enggau madahka reti pemesai guna nagang pengawa jai.

Sekeda isu rama iya nya nempa komuniti bepengerai enggau kandang ngelingi ke likun ba mensia mayuh bela dikemerat nengah licha enggau sesi meri penerang ti dikenataika Zulkipli denggau bala pemesai kanan polis Bintulu.

Nya mungkur mayuh pampang dikena nentuka pemadah sentang sekeda isu pengawa jai,gian dadah, penyalah trafik enggau penyalah komersial ulih disadung magang ngagai semua mensia mayuh.  

Program ke bela diatur ba sekeda endur di Bintulu nya nerima sambut ke manah ari semua serak mensia mayuh baka bala ketuai raban bansa, bala ketuai bansa, ejensi perintah, peribit enggau peranak Kampung Jepak.