SARIKEI: Kaban Parlimen (MP) Sarikei Andrew Wong Ling Biu nyemetak madah Program ‘Info-On-Wheel’ (IOW) nya pelasar ti pemadu manah dikena nyadung penerang ti bekaul enggau isu pemadu baru ngagai mensia mayuh ba renggat nembiak redak.
Ku iya, chara meri penerang betemu mua enggau mensia mayuh baka nya beguna amat dikena nentuka komuniti lebih nemu isu ke diatu kelebih agi ti bekaul enggau pengelikun sereta pengerai ti ngaul komitmen semua.
“Program tu pelasar dikena perintah nyadung penerang sentang polisi perintah sereta informasyen ke pemadu baru ngagai mensia mayuh sentang isu maya diatu ba renggat nengeri enggau nasional nengah chara betemu mua seriris enggau pengawa Komunikasyen Perintah dikena nyeliahka pekara ti nyadung berita pelesu ari sekeda orang.
“Isu pemadu besai ti dikemerat nengah program tu iya nya sentang pengelekai igi penyakit COVID-19 ti nyadi isu nasional enggau global ti benung ditapi di serata dunya maya diatu.
“Pekara nya patut diberi perati lalu komuniti ba renggat nembiak redak patut nemu sereta beratka isu ke bekaul enggau tu,” ku Andrew.
Iya madah munyi nya lebuh dikerandau media maya begulai enggau Opis Pemadah Malaysia Bagi Menua Sarikei ba Program IOW di Sentral Market Sarikei, ensanus.
Ba program nya, Andrew begulai enggau pengereja pengawa Opis Pemadah Bagi Menua Sarikei udah besaup nyadung brosur bekaul COVID-19 enggau informasyen ti bekaul polisi sereta program ti dipejalaika perintah ungkup rayat.
Ba program nya, Andrew mega ngansak mensia mayuh ngambika enda nyadung sebarang berita ti bedau ditentuka pengamat sesebengkah berita nya.
“Kami deka mensia mayuh nerima penerang ti betul ke pemaik semua sereta opis perintah ti bekaul.
“Ba awak ke sama mega, kami deka mensia mayuh ulih ngenyemakka diri rat agi enggau ejensi sereta opis perintah ti diau ba endur ngelingi sida kelebih agi ti sedia deka nyaup enggau meri bantu ngagai komuniti,” ku Andrew agi.
Ba program tu, Andrew mega bisi ngelimpangka diri begulai enggau bala peranak kandang menua nya ti datai ngagai Pasar Sentral Sarikei.