Anda di sini

Sarawak ulih nyadi nengeri maju nengah teknologi

Advertisement
 Wong lebuh dikerandau raban pengarang berita, kemari.
ULIH MAJU NENGAH TEKNOLOGI: Wong lebuh dikerandau raban pengarang berita, kemari.

KOTA SAMARAHAN: Nengeri tu bisi strategi enggau perambu ti manah ba polisi pemansang Ekonomi Digital, ti ulih nempa Sarawak nyadi nengeri maju ba taun 2030, nengah teknologi.

Chairman Malaysian American Electronic Industry (MABI), Datuk Seri Wong Siew Hai madahka, enti bisi pelin ti manah sereta dipejalaika enggau manah, nengeri tu ulih  nyadi menua maju nengah teknologi. “Kebendar aku enda nemu endar pasal polisi ekonomi digital Sarawak.

“Tang nengeri tu bisi aspirasyen deka nyadi tauka ngemeranka ekonomi digital sereta bisi strategi enggau perambu ti manah, aku ngasaika nengeri tu ulih nyapai nya (nengeri maju nengah teknologi ba taun2030).

“Chara ngiring sereta sukung positif ari perintah aku ngasaika nya ulih dijapai ti semina begunaka pelin ti manah enggau chara bejalaika ti manah,” ku iya lebuh dikerandau raban pengarang berita.

Wong dulu ari nya ngulu sereta bejaku ba program ‘Learn from The CEO : Personal Journey to Corporate World’ ti diatur Fakulti Sains Kognitif & Pemansang Mensia (FSKPM), Universiti Malaysia Sarawak (UNIMAS) ba Bilik Seminar PITAS UNIMAS ditu, kemari.

Nambahka nya, iya madah perintah bebendar meransang  mayuh agi kompeni di Malaysia ngemeran sereta ngemeratka Revolusyen Industri 4.0 (IR4.0). Iya madahka perintah bisi nyendiaka geran dikena ngemeranka IR nya.

“IR4.0 ulih mantu nambahka produktiviti, kualiti enggau servis sereta ke bukai kompeni. “Diatu kitai mekuh ngagai kompeni Malaysia ti mit, kebuah pia laban kompeni besai udah ngemeran sereta ngemeratka IR4.0,” ku iya.

Sama bisi ba pengerami nya kemari, Dekan (FSKPM) Asso Prof Dr Surena Sabil, Sapit Mandal Chanselor (Akademik & Antarabansa) Proff Dr. Ahmad Hata Rasit enggau ke bukai.