KUCHING: Opis Pengerai Nengeri Sarawak ngenadaika mesej ti dikerembai ba media sosial sentang penyadi kes COVID-19 di nengeri tu.
Direktor Opis Pengerai Nengeri Sarawak, Dr Chin Zin Hing nengah siti penerang kemari madahka mesej nya bula sereta nyemetak madahka nadai kes ditukuka COVID-19 diripot di nengeri tu.
“Nyentuk pukul 12 tengah hari, 12 Februari 2020, udah nerima 76 kes iti kes ke diripot ti dipelabaka (PUI) COVID-19.
“Ari penyampau nya, nadai kes positif diripot, iya nya 59 kes udah ditukuka negatif nengah peresa makmal lalu 17 iti kes agi mengkang nganti pemutus,” ku iya.
Berebak enggau nya, mensia mayuh seruran dipinta meda penerang ti dikeluarka sekalika ari Menteri Besai, Sapit Menteri Besai, Menteri Pengerai tauka Ketuai Direktor Opis Pengerai ngambika nemu gaya penyadi penyakit COVID-19 di Malaysia kelebih agi di Sarawak.
Mensia mayuh mega dilalu ngambika anang nyadung berita bula.
Semua dilalau, pengawa nyadung berita bula nya tau diukum ari baruh Seksyen 233 Akta Komunikasiyen enggau Multimedia (AKM) 1998.
Enti ditemu salah, tau diukum mata duit maksimum RM50,000 tauka dijil enda ngelui timpuh satu taun tauka kededua nya sereta mega diukum baru RM1,000 ungkup tiap hari penyalah nya enti agi digaga pengudah ditemu amat salah.