Anda di sini

Mensia mayuh diperansang datai meda konsert ‘Paint The World 2020’

Advertisement
 Abdul Karim begambar enggau tim Paint the World Malaysia ti betuaika Aziza (bediri, kiba)sereta disempulang ke bukai pengudah nemuai meri basa, ensanus.-— Gambar Roystein Emmor
NEMUAI MERI BASA: Abdul Karim begambar enggau tim Paint the World Malaysia ti betuaika Aziza (bediri, kiba)sereta disempulang ke bukai pengudah nemuai meri basa, ensanus.-— Gambar Roystein Emmor

KUCHING: Mensia mayuh kelebih agi raban nembiak diperansang datai ngagai Konsert Antarabansa ‘Paint The World 2020’ ti diatur kena 15 Februari (pagila) ba Kunsil Nengeri (DUN) Lama, ti ngayanka penyelai ari konsert ke sebedau tu.

Konsert diatur ari pukul 2.30 ngalih hari lalu tama enda bebayar nya deka mai dua iku indu Pakistan iya nya Shazia Ramzan enggau Kainat Riaz ti kala napi pemar ketegal deka ngetanka hak sida.

Seduai iya kala napi pemar ba menua seduai iya, lalu berindik ari bisi bantu ari rayat dunya seduai ulih ngasaika pengidup baka indu menua bukai sereta diatu benung nampung pelajar renggat tinggi di menua United Kingdom.

Menteri Dagang Temuai, Seni enggau Main Asal Datuk Abdul Karim Rahman Hamzah madah perintah nengeri tu nyukung konsert ti diatur tim ti betuaika Penengkebang sereta Chairlady of Paint the World Malaysia, Aziza Aznizan.

“Konsert Antarabansa ‘Paint the World’ deka diatur ba DUN Lama kena 15 Februari tu, ujung minggu tu berengkah pukul pukul 2.30 ngalih hari.

“Pengerami tu deka mandangka video, Shazia enggau Kainat ti deka bekunsika peneleba ba pekara ti nyadi di Pakistan kelebih agi bekaul enggau hak orang indu.

“Kitai untung amat sida bisi ditu, ti mai pekara bekaul enggau sada pengelikun ti dikena menua ba serata dunya ngambika ulih beserakup sereta ulih nerima penemu pangan diri laban tetiap menua bebida pekara ti nyadi,” ku iya seraya madah Malaysia untung laban nadai orang ti kelalu ekstrim lalu orang indu sama diberi peluang ngulihka pemandai.

Abdul Karim mansutka pekara nya ba aum pengarang berita nyerumba penemuai basa tim Paint the World Malaysia bekaul enggau konsert nya, ti diatur ba Bilik Baum di Begunan Baitulmakmur ditu, ensanus.

Tuju konsert tauka pengerami tu nya dikena bekunsika penemu pasal ngenan, ngalau tauka nyaga jelu siga, hak orang indu ba pelajar, ketuai nembiak enggau bekunsi bekaul enggau pengawa dagang.

Nengah konsert nya, raban nembiak deka diberi awak bekunsi, bejuraika penemu sereta berandauka nama chara mutuska pekara dikena mantu ngemansangka Sarawak.

Tu peluang tauka platform penemu ari raban nembiak Sarawak dipendingka.

Tu taun taun kelima konsert ke sebaka diatur deka dipasuk volunteer lebih ari 12 menua ari serata dunya baka Indonesia, Georgia, Rusia, pakistan, Spain enggau ke bukai kelimpah ari Semanjung Malaysia.