SARIKEI: Lumba enggau main iya nya siti bidang ti endang beguna dalam nempa rebak nembiak ti ngembuan ulah ke manah sereta bisi runding ti deka besemekih.
Kaban Parlimen (MP) Julau Larry Sng Wei Shien madahka pekara tu iya nya siti ari pemaik ngagai penyulut dalam pelajar luar enggau pengerai dalam kelas.
“Lumba enggau main ukai semina dikena ngisi maya lepa sereta nyadika pekara ti digaga ninting hari ke eksesais dikena ngulihka tubuh ti gerai sereta untak ti regas lalu ulih berunding enggau manah.
“Lumba belanda iya nya lumba enggau main pemun enti dibandingka enggau main ke bukai.
“Sida ti ngembuan potensial ulih dipujur lalu dikemansang dalam pekit bansa tu lalu terus mansang dalam bidang lumba enggau main ti disereta sida,” ku iya.
Larry madah munyi nya ba Pengerami Pekit Lumba enggau Main Majlis Sukan Sekolah Bagi Menua (MSSB) Sarikei kali ke-46 Taun 2020, ti udah berengkah dipejalai ba Kompleks Lumba enggau Main Sarikei, kemari.
Pekit lumba enggau main MSSB Sarikei sekalitu udah disereta 13 buah sekula sekondari ari bagi menua Sarikei enggau tiga pelilih iya nya MSS Pelilih Sarikei, Meradong enggau Julau.
Batang tuju pekit tu diaturiya nya dikena milih pengari MSSB Sarikei ke pekit Olaharaga Majlis Sukan Sekolah Sarawak ti deka diatur kena 2 nyentukka 5 Mac tu ba Sarikei ti deka datai.
Nitih ku Larry, nengah aktiviti lumba enggau main, ulih ngadaka komuniti ti regas enggau aktif, kelimpah nerenak sereta ngangkatka penyerakup entara rayat pupu bansa sereta jalai pengarap ba renggat baruh.
“Pengeransing dalam lumba enggau main patut seruran bisi dalam runding nembiak sekula ke lalu ulih mantu sida nyapai juluk dalam ngadaka atlit ti betikas profesional, komited sereta dipebasa.
“Beserimbai enggau nya, peransang enggau sukung ngagai raban nembiak tu meseti diteruska laban bidang lumba enggau main mega ulih nyamin pengelantang pengidup jemah ila nyema ny digaga enggau betul sereta bebendar.
“Pekit lumba enggau main bansa tu iya nya pelasar ti pemadu manah dikena mantaika pengelandik nembiak ba umur ti agi muda ke lalu diangkat ba renggat ke pemadu tinggi jemah ila,” ku iya nambah.
Ba pengerami ti sama mega, Larry udah nyuaka bantu sepenyampau RM20,000 ke MSSB Sarikei lalu RM10,000 ungkup MSSD Julau.
Sama bisi datai ba pengerami nya Ketuai Pemesai Pelilih Sarikei ke mega Chairman MSSB Sarikei Lau Ngie Tung, Ketuai Pemesai Pelajar Pelilih Meradong ke mega MAndal Chairman 1 MSSB Sarikei Ismail Abang Mahamud, Ketuai Pemesai Pelajar Pelilih Julau, Chairman MSSB Sarikei 2 Dali Rain, Chairman Prinsipal Sekula Sekondari Bagi Menua Sarikei Vincent Leong Shou Chuan sereta bala apai indai nembiak.