Anda di sini

Beri sukung penuh ngagai GPS

Advertisement
 Datin Monica nerima tepa ari  KK. Azman Galau.
UNGKUP NUAN: Datin Monica nerima tepa ari KK. Azman Galau.

MARUDI: Rayat nengeri tu mesti meri sukung penuh ngagai perintah nengeri ti betuaika GPS ke megai perintah sereta ngatur Sarawak sereta nentuka hak rayat diintu sereta dijaga.

Ketegal nya rayat mesti meri sukung penuh ngagai perintah GPS ke megai Sarawak, pia ku Menteri Muda Kaunsil Kandang Menua,Datu Dr Penguang Manggil.  

“Kitai patut negi sereta nyukung ‘sepiak’ kitai empu lalu tu nyengkaum pengawa kitai ti negi sereta ngetanka hak kitai baka ke bisi ditulis dalam Sempekat Malaysia 1963 (MA63) enggau akta imigresyen.

“Kitai mega enggaika orang luar bedagang di nengeri kitai lalu ngambi penguntung kelebih agi ari Semenanjung Malaysia,” tambah iya.

Penguang madah munyi nya lebuh bejaku Bejadi Pengerami Ketuai Begulai enggau Rayat ba Surau Nur Ikhsan, Kampung Pemindahan ditu, bedau lama udah.

Ku Penguang ke mega ADUN Marudi, sekeda di Semenanjung mengkang ngembuan runding ti enda maju sereta ngumbai   agi bisi orang Sarawak  diau ba atas pun kayu tauka dalam kampung enggau ke bukai.

“Nya alai rayat Marudi anang sesekali mendingka propanganda bula ke disadung sekeda orang luar nya, ti ngembuan agenda kediri.   

“Awak ke orang (ari) Semenanjung nya empu datai ke Sarawak ngambika iya meda tauka nentuka kediri berita selebubu nya, sekalika amat tauka salah,” ku Penguang.

Dikena ngamatka penyiru perintah nengeri ba pemansang di Marudi, Penguang madahka sitak iya udah diberi projek besai baka Jematan Marudi ke meraka Batang Baram, Waterfront Sungai Marudi, dinding semin tebing sungai ke beungkus RM6.3 milion.  

Bela dikemansangka iya nya nambahka tampung estet industri mit ba Kampung Pemindahan, semak Stadium Mit ditu enggau jalai alun ari Marudi ke Long Terawan ngambika bala temuai mudah nemuai ke Taman Negara Mulu.

“Taun 2020 tu nyadi taun ke beguna amat dikena mai ubah di Marudi enggau Baram.

“Nya kebuah, kitai patut bekerejasama negapka sitak kitai ngambika ulih beserakup lalu meri sukung penuh ngagai perintah nengeri,” ku iya.

Ku Penguang, Dewan Mayuhguna ti diperambu deka digaga ba Kampung Pemindahan udah dikemendarka lalu deka digaga ba Lot 222 di Kampung Pemindahan, ke sebedau tu udah ditulak Opis Tanah enggau Survei (JTS).  

Berebak engagu nya, iya minta peranak Kampung Pemindahan ngambika majak beserakup sereta bekerejasama dikena nentuka projek ti digaga ba kandang menua sida lanchar.

Advertisement