SIBU: Rumah sementara deka digaga nengah pengawa beripai ungkup 22 ruang bilik ti dituntung penusah angus ba Rh Dingun Megong, pia ku Kaban Kunsil Nengeri Tamin Christopher Gira.
Rumah panjai 22 pintu skim pengentap berumah baru di Sekuau ba KM45, Jalai Oya udah dituntung penusah angus ensanus.
Ku Gira, tu penusah angus keterubah nyadi di Selangau taun tu. Aku udah minta bala ketuai komuniti, opis enggau ejensi perintah ngiga bantu ngenyit ngagai sida ke tasah nya baka pemakai, ai enggau tepung tusu ungkup anak sida.
Mega, nyendiaka bantu ari sukut pemakai enggau gari ungkup timpuh tu kelimpah nyendiaka palan ngenduh sementara ba bala mayuhguna di Sekuau.
Lalu rumah sementara ungkup tetiap ruang bilik, aku deka bekerejasama enggau pemekal ngambi nyendiaka perengka dikena berumah lalu rumah nya deka digaga nengah chara beripai.
Iya madahka semua bantu deka dikerandau silik agi enti udah nerima timbal ari semua ejensi ke bekaul.
Gira madah ngagai The Borneo Post munyi tu pengudah ke ditanya sentang bantu ke deka diberi ngagai sida ke tasah angus nya.
Berebak enggau nya, Residen Sibu Charles Siaw madah balai nya muat endur lebih 200 iku.
Penyampau sida ke tasah nya bisi 123 iku ari 22 buah ruang bilik.
Siaw mega madahka pemesai opis pelilih Selangau, Inting Nyami udah ngabas palan nya mutarka pekara ke patut.
Sama bisi ngabas sida ke tasah angus, Penghulu Andrewson Ngalai.