KUCHING: Parti Sarawak Bersatu (PSB) ngelaluka pemutus Kort Federal berkaul enggau kes Dr Ting Tiong Choon, ngemendarka apil ari Dato Sri Wong Soon Koh, Speaker Kunsil Nengeri (DUN) Datuk Amar Mohamad Asfia Awang Nassar enggau DUN Sarawak.
PSB nengah penerang berita kemari madahka pemutus Kort Federal nya ngenukuka kuasa DUN bisi kuasa nentuka pematut bala kaban iya enggau chara betul mutarka isu ti nyadi sebedau enggau sepengudah ti nadai pematut ba pengawa bepilih.
Ku PSB, Dr Ting Tiong Choon nyata siku orang ke enda patut agi ari baruh Konstitusyen Nengeri Sarawak sepengudah pengawa bepilih.
“Ngemendarka sesiku orang ke endang amat patut dalam DUN ngambika diperunding sereta diundi enti ungkup undang-undang ke nyadi pengelurus nya enda manah,” ku PSB.
Dr Ting, ari Parti Tindakan Demokratik nadai agi pematut nyadi ADUN Pujut berindik ari pemutus Kort Federal di Putrajaya kemari ngarika DUN dalam kes ti bekaul enggau status dua peranak menua ke diempu Dr Ting, iya nya peranak menua Malaysia enggau Australia.
Kemari Kort Federal di Putrajaya nyeliahka pemutus Kort Apil enggau Kort Tinggi Kuching nikalka penuduk Dr Ting nyadi ADUN Pujut dalam pemutus majoriti tujuh ngelaban dua.
Kort Federal nemu Kunsil Nengeri (DUN) bisi kuasa nginsil pematut Dr Ting nyadi kaban laban iya ngembuan dua peranak menua (Malaysia enggau Australia) taja pan iya ngelengkaka nya sebedau bediri minta pilih ba pengawa bepilih nengeri ke-11, kena 2016.
Kort Baruh ngaga pemutus ke alai DUN nadai kuasa ningkilka kaban sida iya.
Kelimpah DUN, sama bisi ngenataika apil kes nya ba Kort Federal kemari iya nya ex-Menteri Wang Kedua Dato Sri Wong Soon Koh, perintah nengeri enggau Komiti Pengawa Bepilih (SPR).
Panel akim Kort Federal ti betuaika Ketuai Akim Menua Tan Sri Tengku Maimun Tuan Mat mega ngaga pemutus ke alai Speaker DUN (Mohamad Asfia) enda ngelanggar ‘keadilan asasi’ maya ngaga pemutus bekaul enggau pengelenyau pematut Dr Ting nyadi Kaban Kunsil.
Luyar Cecil Abraham enggau Shankar Ram ngarika Asfia, Jonathan Tay ngarika Soon Koh lalu Luyar Besai Nengeri Datuk Talat Mahmood Abdul Rashid ngarika Perintah Nengeri sereta SPR diarika (luyar) Shamsul Bahrain.
Dr Ting diarika tim luyar ari Chong Siew Chiang.