MIRI: Perintah Sarawak ari baruh Gabungan Parti Sarawak (GPS) deka ngiga sebarang chara dikena ngemanahka sekula repuk di nengeri tu, taja pan pekara infrastruktur ari baruh bidang kuasa perintah besai.
Kaban Kunsil Nengeri Dennis Ngau madah, komitmen nya mandangka pengawa perintah nengeri dikena nentuka nembiak sekula di menua pesisir ulih nerima pelajar ti bekualiti nyengkaum infrastruktur sekula.
“Tu amat ngenyinuka ati lebuh ti meda nyauka semua sekula ba sitak aku agi kurang ari sukut gaya perengkaguna, kuarters pengajar enggau buding nembiak repuk, penanggul bekal ai, padang lumba enggau main sereta dewan aktiviti mega nadai.
“Sebut aja, sekula kandang menua pesisir kami tu nyauka semua kurang ti patut dikumbai sebuah sekula,” ku iya madah ngagai Borneo Post pengudah bejadi ba pengawa nyuaka dokumen kunterik ngaga balai mayuhguna Sekula Primari (SK) Long Luyang ba premis sekula di Long Luyang, Telang Usan, Ulu Baram bedau lama udah.
Berebak enggau nya, iya nyemetak madah endang patut perintah besai meda tikas gaya sekula kandang menua pesisir di semua pesisir Ulu Baram ngambika nemu gaya kebendar sekula nya sebedau ngatur sebarang polisi ‘unseat’.
“Tinggalka dulu pekara sentang isu politik lalu kemujurka pengawa kami ti deka bekerejasama sereta ngemanahka sekula repuk menua pesisir ngambika lebih konduksif sereta lantang endur belajar.”
Iya nambah, ungkus ngaga balai mayuhguna sepenyampau RM300,000 ungkup sekula nya ti dipelanja seratus peratus ari perintah nengeri nengah Program Transformasyen Menua Pesisir (RTP).
“Taja polisi ba pekara infrastruktur sekula ari baruh rintai perintah besai, tang perintah nengeri enggai meda gaya sekula repuk ba kandang menua pesisir majak bakanya.
“Pekara nya amat ngelantangka ati lebuh meda pengeransing perintah nengeri melanja balai mayuhguna SK Long Luyang ti udah meri pengaga ngagai pengereja pengawa sekula, gerempung apai indai enggau pengajar (PIBG) enggau mega bala nembiak sekula.”
Iya mega madah projek balai mayuhguna ke sama bakanya mega udah bulih pemendar dipejalaika ungkup SMK Long Lama ba taun nyin tadi.
Sebedau tu, iya madah sepenyampau RM200,000 udah diberi ari baruh RTP dikena ngaga SJK © Kee Tee di Long Lama enggau projek ngaga atap endur palan aum (assembly) SK9 Long Bedian.
Sama bisi datai iya nya pengari kunteriktor projek, JKR Miri enggau komiti PIBG sekula.