MIRI: “Aku nerima pemutus tu taja pan udah gawa lebih dua taun ba Kunsil Nengeri Pujut,” pia ku Kaban Parti Tindakan Demokratik (DAP) Dr Ting Tiong Choon.
Dr Ting nadai agi pematut nyadi ADUN Pujut berindik ari pemutus Kort Federal di Putrajaya kemari ti ngarika DUN Sarawak dalam kes bekaul enggau status peranak menua ke diempu iya.
Dr Ting lebuh ke dikerandau madahka pemutus nya entara ke pemadu dianti iya pengudah ti becharaka iya nyadi peranak menua kenyau ari taun 2017.
Iya enda ulih ngelalaika penyinu ati iya tang ngalahka diri nerima pemutus Kort Federal enggau ati ke tebuka taja pan pemutus nya enda ngarika iya.
“Taja pia aku meri terima kasih ngagai penyukung aku sereta parti DAP ti ngundi sereta arapka aku nyadi pengari rayat di Pujut,” ku iya.
Pemutus Kort Apil enggau Kort Tinggi Kuching ti nikalka baru pematut Tiong Choon nyadi ADUN Pujut udah diseliahka nengah majoriti tujuh dibanding enggau dua.
Sebedau tu, kena 17 Jun 2017, Kort Tinggi Kuching udah merintahka Dr Ting ti ditingkil ari DUN Sarawak kena 12 Mei, ditikalka baru status iya nyadi ADUN Pujut.
Pemutus nya digaga Akim Datuk Douglas Christ Primis Sikayun pengudah ngemendarka peminta Dr Ting ti ngelaban pemutus Speaker DUN Sarawak Datuk Mohamad Asfia Awang Nassar berkaul enggau pengawa ningkilka iya.
Lebuh becharaka nya, kort tetemuka Dr Ting nadai diberi peluang ti chukup negika diri ti dipadahka nyadi peranak menua Australia.
Kemari pemutus majoriti Kort Federal nemu DUN bisi kuasa nginsil pematut Dr Ting nyadi kaban DUN laban ngembuan dua peranak menua, taja pan iya udah ngelengkaka nya sebelum bediri minta pilih ba pengawa bepilih nengeri ke sebedau tu.
Pematut Dr Ting nyadi ADUN Pujut dikinsil kena 12 Mei, 2017 pengudah mosyen ti dipejuraika di DUN Sarawak ketegal dipadahka ngembuan dua peranak menua iya nya Malaysia enggau Australia.
Ba pengawa bepilih nengeri 2016, Dr Ting udah menang bediri minta pilih ti disatup nengah empat penyuru di Pujut enggau majoriti 1,759 undi, ngalahka Hii King Chiong (BN), Jofri Jaraiee (PAS) enggau Fong Pau Teck (Ngatika Diri).