KUCHING: Bantuan Ihsan Kematian (BIK) RM3,000 semina ulih dikena pemegai Kenyalang Gold Card (KGC) maya pengawa ngintu pemati.
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah madah, bantu nya tau diambi orang ke nampung ruang bilik pemegai KGC ke belanja dikena ngintu pemati.
“Mayuh orang saru sereta ngumbai BIK ulih diambi tekala nya. Nya alai aku deka nerangka ditu, chek RM3,000 ukai diberi tekala nya, ukai.
“Tuju BIK iya nya lebuh pemegai KGC ke patut sereta mati, orang ke nampung ruang bilik iya tau ngambi (RM3,000), ukai diambi maya nuan (pemegai KGC) agi idup, laban nya dikena melanja pemati,” ku iya.
Fatimah mansutka pekara nya lebuh bejaku maya iya bejaku ba atur pengawa nyain sempekat pemereti ati (MoU) Kenyalang Gold Card (KGC) ti diatur ba sebuah hotel ditu, kemari.
Pemeri BIK ngagai pemegai KGC ti mati iya nya inisiatif Perintah Sarawak mantu ngelempungka tating belanja sida sebilik dikena ngintu pemati.
Tetiap iku pemegai KGC ke patut nerima BIK deka bulih RM3,000 siku.
Bantu nya diberi ngagai m ensia mayuh ke kurang penatai pemisi sereta nadai nerima sebarang bantu ngintu pemati ari enda ngira Opis Servis Mensia Mayuh, Insuran enggau Gerempung Pengelikun Sosial (PERKESO) enggau kebukai.
Bil deka dibayar nitihka Prosedur Operasyen Standard (SOP) baka ti udah ditetapka.
Peminta BIK patut dikenataika dalam timpuh 90 hari (3 bulan) pengudah pemegai KGC mati sereta semua peminta patut disempulang ngena setipikit pemati kelimpah ari kad pengelala orang ke nampung ruang bilik pemegai kad nya.
KGC inisiatif perintah nengeri dikena ngangkatka pengelantang enggau pendiau orang lunggar umur di Sarawak deka dipenyadi enggau rasmi kena 7 Mac 2020 nyerumba Simposium Keusahawanan Wanita ti diatur Opis Orang Indu enggau Ruang Bilik Sarawak (JWKS) ba BCCK sereta dipenyadi Kepala Menteri Datuk Patinggi Abang Johari Tun Openg.
Taja pan KGC dipenyadi rasmi bulan Mac tang peminta ulih berengkah dikenataika ari diatu sereta pom tau diambi ba Opis Pengintu Pengelantang Pendiau enggau Raban Bansa Nengeri Sarawak (JKMNS), Opis Residen, Opis Pelilih Menua enggau Opis Pelilih Menua Mit kelimpah ari tau ngambi pom nya ba website JMKNS.
Pom ke udah tembu diisi dianjung baru ngagai JKMNS ke bisi ba serata nengeri tu sereta ditetapka 30 hari endur peminta nya dikemendarka.
Penguntung bisi KGC baka diskaun enggau rebat ungkup sekeda servis sereta barang ke diguna orang lunggar umur di Sarawak.
Naka 10 Februari 2020 bisi 74,613 tauka 22 peratus ari 334,500 iku penyampau warga emas (beumur 60 taun ke atas) ke udah minta KGC,” ku iya seraya madahka inisiatif nya dipejalaika Opis Pengiting Penyampau Tubuh Malaysia dipelabaka ba taun 2030, Sarawak melabaka bisi 16 peratus (526,000) lunggar umur.
Bisi ba pengerami nya, Menteri Muda Pengelantang Pendiau Raban Bansa Datuk Francis Harden Hollis, Menteri Muda Orang Indu, Ruang Bilik enggau Pemansang Nembiak Mit Rosey Yunus, Menteri Muda Dagang temuai, Seni enggau Main Asal Datuk Sebastian Ting, Sekretari Mendam Opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dr Saadiah Samad, Direktor Opis Orang Indu enggau Ruang Bilik Sarawak Noriah Ahmad, pemangku Direktor JKMNS Joni Nuruddin bala Kaban Parlimen enggau Kaban Kunsil Nengeri sereta kebukai.