KOTA SAMARAHAN: Bala pengajar dipinta nambah manah teknik ngajar enggau belajarka Jaku Inggeris (BI) ngambika bala nembiak landik ba jaku nya enggau manah.
Sapit Menteri Pelajar Malaysia Teo Nie Ching madah, perintah nemu landik ba Jaku Melayu (BM) nya beguna nyadi jaku menua tang enda ulih dikeenggaika bala nembiak mega patut landik ba Jaku Inggeris.
“Nitihka Pinta Menteri Besai Tun Dr Mahathir Mohamad, aku deka meransang bala pengajar ngambika nambah manah teknik ngajar sereta belajarka BI ngambika bala nembiak landik manah agi ba jaku nya,” ku iya.
Iya bejaku munyi nengah teks jaku iya ke dibacha Sapit Ketuai Direktor Opis Menteri Pelajar Malaysia (KPM) Adzman Talib ba pengerami bejadi ‘Program Ziarah Cakna Peringkat Kebangsaan 2020’ di Sekolah Kebangsaan (Agama) Ibnu Khaldun ditu kemari.
Ku Teo, KPM ti nyadi pengulu ba pengawa ngajar sereta ngadaka modal mensia menua amat komited nitihka polisi enggau kuing setipak enggau Agenda Juluk Pengelantang Ungkup Semua.
“Kitai mesti ngajar bala anak ngambika sida enda tau enda chakah belajar, terus ulih besemekih lalu mutus ati pansut ari penyeranta,” tambah iya.
Bekaul enggau Program Ziarah Cakna, iya madahka statistik program nya ba taun 2019 mandangka 40,158 iku nembiak sekula primari enggau 26,428 iku nembiak sekula sekondari udah dilawa 63,313 pengajar sekula primari enggau 39,715 iku pengajar sekula sekondari.
“Enti dipegulaika bisi 66,586 nembiak, 59,739 ruang bilik enggau 102,488 pengajar ke kaul ba pekara tu, lalu enti kitai mujur ngenataika juluk perintah nengah bemacham inisiatif KPM ngagai penyampau ke mayuh,” ku iya.
Nya alai ku iya, empas ti ulih dijapai enti semua ke bekaul nya ulih meri pengandal ngagai sida ke alai sekula nya siti pemun dikena ngubah pengidup sida enggau ruang bilik sida jemah ila.
Kelimpah ari nya, iya mega ngelalau bala pengajar enggau nembiak sekula ngambika anang bekunsika berita ti nadai temu pengamat.
“Kitai betapi enggau ulah nyadung pemadah palesu di media sosial lalu KPM amat ngemeratka pekara tu.
“Nya alai, maya Program Ziarah Cakna dipejalaika, pengajar tau madah ngagai apai indai enggau mensia mayuh sentang pemar ke tau ditapi ketegal bekunsika berita palesu.
“Aram mih kitai ngajar nembiak, apai indai enggau mensia mayuh ngambika mereri agi maya ngena media sosial, kena mih program tu nyadi pelasar alai nanyaka berita sereta dikena ngajar mensia mayuh,” ku iya.
Sama bisi datai, Sapit Direktor KPM Faridah Yang Razali, Sapit Direktor Kanan KPM Dr Rosli Yacob, Direktor Opis Pelajar Nengeri Sarawak Dr Azhar Ahmad enggau bala temuai ti dipebasa ke bukai.