SIBU: Rumah (Rh) Dingon Megong ke ngembuan 22 pintu ba Skim Sekuau di Kilometer 45 Jalai Oya ditu udah kena tuntung penusah rumah angus, tumu pagi ensanus.
Nitihku padah pengari ari Palan Bejalaika Operasyen Bomba (PGO) Sarawak, sida nerima kangau ngenyit ti bekaul enggau penusah rumah angus tu urung pukul 3.26 pagi.
Berindik ari nya, lapan iku raban ari Balai Bomba enggau Penyelamat (BBP) Sungai Merah lalu dibantu raban bomba ari BBP Sibu dianjung ngagai palan angus tu dikena meri bantu.
“Lebuh raban kami datai ba palan angus tu, dia kami meda rumah nya udah 100 peratus angus,” ku pengari ari PGO Sarawak madah ngagai pengarang berita.
Nangkanka tu, ke diatu semua sida ke tasah dituntung penusah rumah angus nya dianjung sereta ngenduh ba Dewan Mayuhguna Sekuau.