Anda di sini

SUPP pampang Dudong deka numbuhka palan servis ba Sibu Jaya

Advertisement
 Wong (empat kanan) begulai enggau bala kunsilor SRDC sereta SDC lebuh ti nyuaka limau mandarin ba Sibu Jaya, kemari.
MERESA: Wong (empat kanan) begulai enggau bala kunsilor SRDC sereta SDC lebuh ti nyuaka limau mandarin ba Sibu Jaya, kemari.

SIBU: Parti Sa’ati Rayat Sarawak (SUPP) Pampang Dudong deka numbuhka palan servis ba Sibu Jaya pengudah Taun Baru China tu.

Pekara tu udah ditukuka Chairman SUPP Pampang DUdong Wong Ching Yong lebuh ti ngelawa Sibu Jaya, kemari.

“Aku udah berandau enggau Kapitan sereta Penghulu ari pampang parti kita deka numbuhka palan servis komuniti ditu enggau mendam.

“Bisi dipeda pematut dalam numbuhka nya ditu,” ku iya madah ngagai pengarang berita.

Wong madahka, enggau pemisi palan servis tu deka ngemuntangka parti tu bejalaika servis komuniti sereta ke bukai ngagai peranak di kandang menua ditu.

“Palan tu udah ditemu kitai iya nya ba Ringkat 2, Lot 1196, Unit 1, Palan Komersial Sibu Jaya (ba atas Ben’s Pharmacy),” ku iya nambah.

Beserimbai enggau nya, maya program iya ngelawa Sibu Jaya, Wong ti disempulang bala kunsilor SUPP ari Opis Kaunsil Menua Pesisir Sibu (SRDC) enggau Opis Kaunsil Sibu (SDC) udah ngagihka limau mandarin ngagai bala pedagang sereta mensia mayuh dia kandang menua nya.

Wong madah, pemeri nya kelai pengelantang sereta penyerakup ba taun chit tu nitihka kalinda China.

Iya udah meri awak sepengelama sejam begulai, berandau sereta betanyaka penanggul tauka sebarang isu ti ditapi peranak di kandang menua nya kelimpah ari ngagihka limau mandarin.

“Sambut endang rami iya nya mayuh entara peranak andal enggau panatai lalu bisi mega ti meri jaku peransang ngagai aku sereta parti nengah servis kami,” ku iya nerang.

Bekaul Sibu Jaya, iya madah, lebuh jeman Sapit Kepala Menteri Datuk Patinggi Tan Sri Datuk Amar Wong Soon Kai ti ngemunka Pasar Satelit Sibu Jaya kena taun 1995, Soon Kai enda kala merambu Sibu Jaya deka majak mansang nyadi sebuah pasar enggau ekonomi sereta rama ti mansang dalam timpuh kurang ari 20 taun.

“Diatu Sibu Jaya udah ngembuan sekula China iya nya SJKC Tian Hua, SK Sibu Jaya enggau SMK Sibu Jaya. Tu nyata mandangka pemansang Sibu Jaya ti udah nerima perengkaguna ungkup pengelantang komuniti ti udah dilangkar perintah,” ku iya nambah.

Kelimpah ari nya, Wong bisi mega meda raban parti iya ti bisi muka kaunter servis rejister orang lunggar umur di Sibu Jaya ti minta Kenyalang Gold Card (KGC) ti dibuka ba mua Ben’s Pharmacy.

Sambut mensia mayuh endang manah ke alai peranak di kandang menua tu dipeda ngambi peluang ti disediaka SUPP Pampang Dudong.

Advertisement