Anda di sini

Raban bomba seruran besedia nyaga pengelikun nyerumba Taun Baru China

Advertisement
 Wan ngelekatka pangkat baru ngagai siku entara penerima nya kemari.
TEMEGAH ATI: Wan ngelekatka pangkat baru ngagai siku entara penerima nya kemari.

SIBU: Pemangku Ketuai Zon Empat, Opis Bomba enggau Penyelamat Malaysia (JBPM) Sarawak, Wan Kamarudin Wan Ahmad madah, penyampau raban enggau pemesai agi sama semanjai pengerami Taun Baru China.

Ku iya, nya ketegal dikena nentuka pengelikun rayat dijaga semanjai kemisi hari besai ti deka diintu Hari Enam tu.

“Kelimpah matau ba jalai besai, kitai mega deka meresa ba palan dagang ti suah digusung mensia mayuh dikena nentuka nya likun.

“Pia mega raban bomba enggau penyelamat ukai semina besedia ba opis bomba tang sama ba palan ti udah ditetapka ti jauh ari opis bomba enggau penyelamat ngambika bantu ti lengkas ulih disediaka nyema bisi penusah ngenyit,” ku iya.

Iya madah munyi nya ba Pengerami Nyuaka Pangkat Pemesai Bomba KB22 (KUP) Zon 4 Sarawak.

Nitih ku Wan, raban enggau pemesai nya ila deka dibagi ngagai sekeda unit sereta diberi tanggungpengawa nitihka syif enggau maya ke udah ditetapka.

Beserimbai enggau nya bisi 68 iku raban ari Opis Bomba enggau Penyelamat (BBP) Sungai Merah, Sentral Sibu, Song, Kapit, Tanjung Manis enggau Daro datai ba pengerami nya ti diatur ba BBP Sungai Merah ditu.

Lalu bisi dua agi pengerami ti sama diatur ba Bintangor ti ngaul BBP Sarikei, Bintngor enggau Kanowit sereta siti agi pengerami diatur ba Mukah.

Wan madah, pengerami nya diatur keali meri basa ngagai bala raban bomba ti udah ditika pangkat lalu meri sukung ngagai bala penerima ngambika terus meri servis ba tikas ti pemadu manah.

Advertisement