KUCHING: Semua pengari rayat Gabungan Parti Sarawak (GPS) dipinta sereta dilalau terus gawa bebendar dikena nyikap diri napi Pengawa Bepilih Nengeri (PRN) ke deka datai.
Menteri Muda ba Opis Kepala Menteri (Pekara Korporat enggau UKAS) Abdullah Saidol madahka pengari rayat GPS dikeingat ngambika enda ngambi mudah enggau gaya politik ke benung nyadi ba nengeri bukai.
Iya madahka taun 2021 amat beguna iya nya timpuh penggal Kunsil Nengeri (DUN) abis.
"Nya alai kami gawa enggau lebih bebendar, semua YB GPS, sereta pengerami Hari Raya sereta semua pengerami ke diintu iya nya pengerami diintu sebedau pengawa bepilih ke deka datai diatur.
"Semua YB nerima gerah enggu lalau ari Kepala menteri ngambika nentuka semua projek baka RTP enggau ke bukai dipatau sereta semua enda tau enda ngemataka nya kediri empu.
"Tu ukai baka ke ngelama tu, nya alai kitai enggai beambi ulih taja pan gaya politik sepiak nyin charut tang kami enda meda nya nyadi pengelebih, kami nguji enggau ulih ngenegapka nama ke dikembuan," ku iya lebuh dikerandau pemberita.
Dulu ari nya Abdullah ngulu atur pengawa nyuaka bantu duit UNIFOR dikena ngemanahka agi enggau ngaga rumah sembiang fasa 2 2019 ti diatur Unit Pekara Jalai Pengarap Bukai (UNIFOR) ditu, kemari.
Bejaku baru iya madah ke pemadu beguna iya nya rayat ulih meretika nama kebuah parti asal nengeri tu ningkilka diri ari Barisan Nasional (BN) sereta numbuhka GPS.
Ku iya pekara ti nyadi maya pengawa bepilih mit Kimanis iya nya rayat enda nerima parti asal nengeri nya, enda nyadi ba nengeri tu.
"Aku enda ngasaika nama ti nyadi nya (ba Kimanis) enda nyadi di Sarawak laban kitai bisi pekara dikemerat enggau agenda diri empu ti ditanka, enda sama enggai nama ke nyadi ba Kimanis.
"Dalam timpuh ke sama kitai enggai budaya politik ti dikemerankan sepiak nyin dikemeranka ditu," ku iya.