Anda di sini

Kort Tinggi nulak peminta Petronas ningkilka Christopher Chin, ngayanka perintah nengeri mujur ngetanka hak Sarawak

Advertisement

Dikarang Rengenyan Labang


KUCHING: Perintah Sarawak 'menang' belaban dalam pengeran ngetanka hak enggau pemerat Sarawak lebih agi bekaul enggau Petroliam Nasional Berhad (Petronas).

Tu berindik ari Kort Tinggi seharitu ti nulak peminta Petronas ti deka ningkilka Pesuruhjaya Kehakiman Mahkamah Tinggi Kuching, Christopher Chin ari mendingka kes perintah Sarawak enggau Pengawal Chukai Servis enggau Dagang Nengeri (SST).

Menteri ba Opis Kepala Menteri (Pekara Korporat enggau UKAS) Abdullah Saidol madahka, perintah nengeri tu ba pelasar ti betul dalam pengawa ngetanka hak enggau pemerat Sarawak.

"Nama ke nyadi pagi tadi pemenang ngelaban dalam pengeran perintah nengeri ngetanka hak enggau pemerat kitai, lebih agi lebuh bekaul enggau chukai," ku iya lebuh dikerandau raban pengarang berita seharitu.

Abdullah lebuh dikerandau raban pemberita seharitu. - Gambar Roystein Emmor
Abdullah lebuh dikerandau raban pemberita seharitu. - Gambar Roystein Emmor

Dulu ari nya Abdullah ngulu atur pengawa nyuaka bantu Unit Pekara Jalai Pengarap Bukai (UNIFOR) Fasa 2 2019 ti diatur ba sebuah hotel ditu.

Bejaku baru iya bepenemu rayat Sarawak patut nemu, berati sereta nitihka pejalai kes tu ti deka ngetan enggau minta pulai hak enggau kepentingan rayat nengeri tu.

Iya madahka kes nya dipelabaka beguna timpuh panjai ba kort sereta dipelabaka mayuh pekara bukai dibantaika sekalika ari luya perintah nengeri tauka luya Petronas.

"Aku ngasaika enti lalu nadai pemutus tauka pengujung, nyema Petronas agi tengik engka tu deka majak panjai sereta mantaika pekara bukai nyentuk pasal hak kitai ari baruh Petroleum Developmen Act deka dipansutka nyengkaum akta bukai ti bekaul enggau hak kitai.

"Kitai (perintah nengeri) nguji enggau pengabis manah ngetanka (hak enggau pemerat) sereta kitai enggaika 20 taun 30 taun ke deka datai ari diatu rebak ila deka nanya pengeran pemesai kediatu lebih agi GPS ngetanka hak enggau pemerat kitai.

"Nya kebuah kami (pemesai) chukup bebendar sereta ngarapka rayat Sarawak deka enggau kami, enda ngira bagi parti politik laban tu pemerat mensia mayuh, nya alai kitai patut beserakup," ku iya.

Kelimpah ari nya, Christopher dalam meri pemutus iya madah, iya nyadi Pesuruhjaya Kehakiman bisi tanggungpengawa besai megai pengawa ti diberi enggau nadai unsur berat sepiak.

"Aku udah angkat sumpah ngetanka kedaulatan undang-undang kelimpah ari bepenemu Badan Kehakiman di malaysia iya nya bebas enggau nadai ngembuan unsur berat sepiak," ku Christopher.

Kes saman sivil Perintah Sarawak enggau Pengawal SST ngagai Petronas seharitu dipendingka ba kort tebuka.

Kena 21 November taun nyin kemari, perintah nengeri memfailkan saman ngagai Petronas berindik ari ti enda ulih mayar SST ungkup produk petroleum ari baruh Ordinan Cukai Jualan Negeri 1998.
 

Advertisement