Anda di sini

Ketuai rumah sembiang jalai pengarap ukai Islam, ADUN GPS dilalau nganjung peminta bantu ngagai UNIFOR kena 15 Februari tu

Advertisement
Uggah nyuaka chek bantu UNIFOR 2019 ngagai ADUN Layar Gerald Rentap Jabu ,  seraya diperatika (ari kiba) Talib, Dr Rundi sereta (ari kanan) Richard enggau Dr Sim,  seharitu. - Gambar Roystein Emmor
Uggah nyuaka chek bantu UNIFOR 2019 ngagai ADUN Layar Gerald Rentap Jabu, seraya diperatika (ari kiba) Talib, Dr Rundi sereta (ari kanan) Richard enggau Dr Sim, seharitu. - Gambar Roystein Emmor

Dikarang Rengenyan Labang


KUCHING: Bala ketuai rumah sembiang jalai pengarap ukai Islam enggau Kaban Kunsil Nengeri (ADUN) Gabungan Parti Sarawak dipinta nganjung peminta bantu ngagai Unit Pekara Jalai Pengarap Bukai (UNIFOR) kena 15 Februari tu.


Sapit Kepala Menteri, Datuk Amar Douglas Uggah Embas madahka nya ngambi atur pengawa nyuaka bantu UNIFOR 2020 ulih dipejalaika tumu agi.


Ungkup taun 2020, perintah nengeri ngungkupka RM50 juta ngagai UNIFOR dikena mantu ngemanahka agi tauka ngaga gerija tauka rumah sembiang jalai pengarap ukai Islam di nengeri tu.


"Aku ngarapka bala ketuai gerija tauka rumah sembiang jalai pengarap ukai Islam nyengkaum lebih agi Kaban Kunsil Nengeri (ADUN) ari Gabungan Parti Sarawak (GPS) enti bedau nganjung lis, anjung ngagai kami kena 15 Februari tu.


"Laban taun tu aku ngarapka chek ulih diberi tumu agi. Aku merambu deka ngatur pengerami nyuaka bantu UNIFOR dalam bulan April 2020.

"Sapa ke laun nya enda bulih, anang nyalahka aku enti enda diungkupka. Lalu udah tentu mega tau nganjung peminta bantu belanja ngagai YAB Kepala Menteri baka maya bisi nemuai tauka pengerami (ngagai endur kita)," ku iya ti nyadi menteri megai tanggungpengawa nyaga UNIFOR.


Uggah mansutka pekara nya lebuh iya bejaku ba atur pengawa nyuaka chek sepenyampau RM10.9 juta UNIFOR Fasa 2 2019 ti diatur ba sebuah hotel ditu, sehari tu.


Taun 2019 ku iya, perintah nengeri ngungkupka RM30 juta lalu tu dikena mantu sereta bejalaika 212 projek ngemanahka agi enggau ngaga rumah sembiang sereta ari penyampau nya (RM30 juta)  sepenyampau RM19.1 juta diberi ba fasa keterubah dikena bejalaika 109 projek, ti disuaka taun 2019.


"Lalu seharitu  fasa kedua kitai nyuaka chek sepenyampau RM10.9 juta ngagai 103 penerima rumah sembiang tauka projek," ku iya.


UNIFOR, ba taun 2017 diungkupka RM15 juta sereta 2018 diungkupka RM20 juta.


Berebak enggau tu Uggah minta bala ADUN matai projek ti dipejalaika nengah UNIFOR dikena ngenukuka asil projek nya ngemuaska ati rayat.

Bisi datai ba atur pengawa nya, Menteri ba Opis Kepala Menteri (Integriti enggau Ombudsman) Datuk Talib Zulpilip; Menteri Utiliti Dato Sri Dr Stephen Rundi Utom; Menteri Kaunsil Kandang Menua enggau pengawa Berumah Dato Sri Dr Sim Kui Hian; Direktor UNIFOR Richard Lon enggau bala ADUN sereta pengari ari rumah sembiang jalai pengarap bukai.
 

Advertisement