KUCHING: Isu sekeda pemekal nyendiaka paung rian ukai Musang King ngagai orang ke nanam tang madahka nya paung Musang King, pansut baru di nengeri tu.
Sapit Kepala Menteri, Datuk Amar Douglas Uggah Embas madah, iya minta pengawa nipu nya diketuka.
“Aku minta raban ari opis ke megai tanggungpengawa magi paung Musang King ke tulin ngagai orang ke betanam lalu nentuka paung nya endang amat tulin.
“Pemekal ngembuan ulah ti enda manah laban nyampurka paung bansa bukai enggau paung Musang King.Tu kala nyadi suba sereta nyadi baru diatu, tu nyadi ketegal bisi peminta ke tinggi,” ku iya.
Iya madah munyi nya maya ngulu sesi meri pemadah sentang pemansang enggau program Pemansang Betanam Betupi Bagi Menua Serian ba Opis Betanam Betupi Pelilih Serian, ditu kemari.
Sama bisi ngulu sesi meri pemadah nya Menteri Pelajar, Sains enggau Pansik Teknologi, Dato Sri Michael Manyin Jawong; Menteri Muda Betanam Betupi Moden, Tanah Adat enggau Pemansang Kandang Menua, Datuk Roland Sagah Wee Inn, Menteri Muda Betanam Betupi Moden, Tanah Adat enggau Pemansang Kandang Menua, Datuk Dr Abdul Rahman Ismail, Kaban Parlimen Serian, Datuk Seri Dr Richard Riot enggau Kaban Kunsil Nengeri Tebedu, Martin Ben.
Bela bisi datai, Sekretari Mendam Opis Menteri Betanam Betupi Moden, Tanah Adat enggau Pemansang Kandang Menua, Awang Johari Awang Mustapha, Direktor Opis Betanam Betupi Nengeri, Dr. Alvin Chai enggau Residen Serian, Suni Tuah sereta bala temuai bukai.
Uggah ke mega Menteri Betanam Betupi Moden, Tanah Adat enggau Pemansang Kandang Menua madah, orang ke deka nanam nya ti enda puas ati, udah ngena media rama alai mantaika pengasa ati sida.
“Tu udah nempa peragam ati ti enda manah ba mensia mayuh sentang program tu lalu bisi sekeda nya nyalahka perintah ba pekara tu,” ku iya.
Ku Uggah, nya alai pemesai patut nentuka pemekal ke dipilih mekalka paung nya mesti bisi kebun.
“Tu dikena nyeliahka sida bulih paung ari orang bukai nyengkaum ari menua luar,” ku iya.
Sentang isu ke sama ku iya, kus chara nyaga paung enggau chara ke betul deka diatur ungkup orang ke betanam nya.
“Aku mega ngansak bala pemesai ngambika bejaku enggau pengari rayat sitak sida maya nyadung paung nya bekaul enggau pengawa nanam baru sereta sekeda program bukai ke bekaul,” ku iya.
Nangkanka nya, Uggah lalu nemuai ngagai palan nerenak ikan Emperau ba Opis Berikan Menua Pesisir, Opis Betanam Betupi Tarat.