SIBU: Parti SeAti Rayat Sarawak (SUPP) pampang Dudong udah ngatur palan servis mobil dikena mantu rayat beumur 60 taun ke atas minta Kad Gold Kenyalang.
Kaunter palan servis mobil nya diatur di Palan Bebelika Barang Farley, Jalai Salim ditu, kemari.
Chairman SUPP pampang Dudong Wong Ching Yong madah, pemaik ari kad nya nyengkaum ngulihka diskaun bebeli enggau kompeni kunsi, pasaraya enggau kedai mit.
Taja pia, ku iya, rintai kompeni kunsi enggau Kad Gold Kenyalang deka dipadah pengudah ngelancharka kad nya ari Kepala Menteri Datuk Patinggi Abang Johari Tun Openg ba hari bulan ti deka dipadah ila.
“Kami endang komited deka mantu raban nya minta kad nya ke pengelantang sida.
“Nengah pemisi kaunter bakatu, nya ngemudahka sida agi minta ti nadai ngenusahka proses peminta sida.
“Nya mega ngenyimatka jam, ungkus enggau utai bukai laban komiti aku mantu sida ngisi pom minta kad nya enggau ke bukai,” ku iya madah lebuh dikerandau pengarang berita.
Berebak enggau nya, Wong mega bisi magi limau mandarin ngagai mensia mayuh ti meli barang ba Pasar Grand Heights, Palan Bebelika Barang Farley enggau kedai kopi ba endur nya seraya meri Selamat Taun Baru China.
Kaunter palan servis mobil nya mujur dipejalaika nengah komiti sereta kaban SUPP pampang Dudong.