Anda di sini

Kolej Komuniti ngadaka pekereja ti ngembuan pengelandik ke guna industri

Advertisement
 Alan nerima tepa ari Hazzatta lalu begambar enggau pengereja pengawa Kolej Komuniti Miri maya nemuai ngagai opis iya, bedau lama ti udah.
TEPA: Alan nerima tepa ari Hazzatta lalu begambar enggau pengereja pengawa Kolej Komuniti Miri maya nemuai ngagai opis iya, bedau lama ti udah.

MIRI: Kolej Komuniti bisi nyendiaka pelajar ti bekualiti, beteknologi tinggi sereta holistik nempa rebak pekereja ngembuan pengelandik ke guna industri.

Ahli Dewan Negara Senator Alan Ling madah, pangku pengawa institusyen pelajar tinggi nya seriris enggau juluk perintah ti deka ngadaka graduet Teknikal Vokasional Pelajar enggau Latih (TVET) napi pemar Revolusyen Industri 4.0.

“Entara siti chara Kolej Komuniti iya nya penyereta komuniti kelebih agi dalam pelajar semanjai idup dikena numbuhka komuniti ti bepenemu.

“Kelimpah ari nya, Kolej Komuniti mega chakah bejalaika latih dikena ngangkatka pengelandik, latih ngenegapka pengelandik ungkup ke guna pekereja nengeri tu,” ku iya nerang.

Kolej Komuniti nyendiaka latih pengelandik dalam bidang teknikal enggau vokasional nyengkaum bidang pengawa dagang, mekanikal, elektrikal enggau mega bidang ke bukai ungkup nembiak.

Iya nambah, kus ke bisi disediaka iya nya nitih ke guna ba makit enggau peranak kandang menua tu.

Kelimpah Miri, pampang bukai iya nya Kolej Komuniti di Sarawak baka di Kuching, Mas Gading Bau, Betong, Santubong enggau Sarikei.

Nyentuk ke diatu, bisi 103 buah Kolej Komuniti di selampur menua ti bisi nyendiaka bidang pelajar renggat Setipikit enggau Diploma sereta kus timpuh pandak.

Berebak enggau nya, Alan nerima penemuai meri basa ari raban Kolej Komuniti Miri betuaika Direktor, Hazzatta Morshidi ti nemuai ngagai opis iya bedau lama ti udah.

Alan diberi licha sentang bidang pelajar,pemutus peresa enggau perambu dudi hari Kolej Komuniti Miri.

Sida ti deka nemu penerang ti silik sentang Kolej Komuniti Miri ulih betanya nengah lumur 085-653545 tauka ngagai palan Kolej di Lot 5600, Jalai Permyjaya.

Advertisement