SIBU: Urung 500 iti kupon dikena ngisi minyak enda bebayar sepenyampau RM5 ungkup orang ti bekenaka mutosikal iya nya siti bantu ti diberi Palan Servis P.212 Sibu udah ambis disadung sepengelama kurang ari tiga jam.
Kenyau ari pukul 8 pagi, seraban orang ti bekenaka mutosikal udah beripih nganti ba Stesyen Petronas Jalai Tun Abang Haji Openg 2 ngulihka kupon ke berengkah disadung pukul 9 pagi.
Ku Kaban Parlimen (MP) Sibu Oscar Ling, program tu mai tuju dikena mantu orang ti seranta beserimbai enggau ngintu Taun Baru China.
“Ke diatu, kami nyuaka 500 iti kupon dikena ngisi minyak enda bebayar ngagai 500 iku orang ti bekenaka mutosikal ti tumu datai ngagai stesyen minyak tu,” ku iya.
Berebak enggau tu, Ling madahka program kali kedua tu deka majak diatur laban bisi nerima sambut ti chukup manah ari mensia mayuh.
“Ba asai aku, rayat ti bulih bantu tu mega berasai gaga ati,” ku iya madah lalu nambahka program kedua tu diatur enggau manah.
Pia mega, kupon ti disadung nya dikena ngisi minyak ba timpuh sepengelama tiga hari, ti bepun ari Hari Enam nyentukka Hari Satu.