LUBOK ANTU: Klinik Pengerai Lubok Antu beungkus RM28 juta ti deka digaga ba timpuh ke semak tu, dikearap ulih bejalaika servis ti manah dikena ngangkatka tikas pengerai peranak di Lubok Antu.
Kaban Parlimen (MP) Jugah Muyang madahka, penemuai Sapit Menteri Pengerai, Dr Lee Boon Chye ngagai taba klinik nya ti pemesai empat hektar, bedau lama ti udah mandangka komitmen perintah besai deka nyendiaka servis pengerai ti bekualiti ungkup peranak ba kandang menua pesisir nya.
“Pengawa ngaga projek Klinik Pengerai Lubok Antu Baru (Bansa 4) nengah agih belanja sepenyampau RM28 juta tu, ukai semina ngelantangka ati aku, tang peranak ba sitak tu.
“Klinik Pengerai baru tu ulih nampung mayuh agi pesakit ti datai berubat dalam sehari pengudah klinik nya tembu ila. Tu tentu ulih mantu ngelempungka agi tating kereja klinik endurnya,” ku iya.
Nitihka Jugah, klinik nya deka nyendiaka palan ti manah enggau disikap ngena perengkaguna sereta fasiliti ke manah agi ungkup pengereja pengawa ti gawa ba klinik nya.
Berebak enggau nya, Dr Lee, kelimpah iya ti ngabas taba klinik nya, bisi mega diberi licha bekaul operasyen enggau fasiliti pengeraisereta ngatur aum enggau ejensi ke bekaul.
Pengudah tembu nemuai ngagai taba Klinik Lubok Antu, Dr Lee udahnya nemuai ngagai Klinik Batang Ai ke alai iya sempat ngelimpangka diri berandau enggau pengereja pengawa Klinik Batang Ai seraya meda fasiliti enggau rampa klinik nya.
“Kami amat lantang ati sereta temegah enggau komitmen ti dipandangka Sapit Menteri Pengerai ke datai ngabas kediri meda taba endur ngaga Klinik Lubok Antu.
“Nya alai, kami endang amat ngarapka asil ari penemuai tu ulih mai ubah ti besai dikena ngangkatmanah servis pengerai ungkup peranak Lubok Antu,” pia ku Jugah madah ngagai Utusan Borneo, bedau lama ti udah.