KUCHING: Lebih 150 iku pesereta iya nya pengelicha, pemesai enggau nembiak Kolej SIDMA sereta pengari ejensi ke bekaul bisi ngulu Licha Ergonomik ke diatur Gerempung Alumni Ejensi Kerejasama Antarabansa Jepun Malaysia (myJICA) enggau Kolej nya.
Nitihka Presiden myJICA Norazizul Abdul Aziz, program nya entara program ninting taun ti diseririska myJICA Sarawak.
Dalam program nya, ku iya, bala pesereta diberi peneleba sentang ergonomik ba palan gawa ti diseriris enggau pengawa sereta rampa kereja.
“Nya ti nyadi pemutus nentuka tikas pemujur pengawa ti dikereja ulih diputarka ke nadai meri empas ngagai tubuh kitai lalu enda ngenataika penusah ngagai pengerai dalam timpuh panjai,” ku iya.
Iya madah munyi nya pengudah bejadika pengerami Bejadika Palan Jaku Jepun Jepun Kolej SIDMA Sarawak ditu, kena Hari Lima.
Berebak enggau nya, Norazizul meri tanda basa ti besai ngagai Pengatur Tinggi Kolej SIDMA ba sukung sereta kerejasama ke udah diberi semanjai program nya dipejalaika.
“Pemujur program tu iya nya asil ari komitmen sereta kerejasama semua orang ke bisi nyereta dalam nentuka program tu ulih dipelajaika enggau mujur,” ku iya.
Sesi licha nya udah diatur alumni myJICA Sarawak, Dr.Alex Kim, ke diatu gawa di Sepital Besai Sarawak.
Bisi mega diatur ba program iya nya sesi bekelala sereta aum khas begulai enggau pengatur alumni myJICA Sarawak.
Sama bisi datai, Chairman Raban Kolej SIDMA Sabah enggau Sarawak, Profesor Dr. Morni Kambrie sereta Pengari myJICA Sarawak, Fazdlina Sapee.