LIMBANG: Perintah terus ngemeratka deka mai pemansang ba taun tu sereta nyendiaka ke guna enggau perengkaguna pemun rayat pesisir enggau kandang menua pesisir di pelilih tu.
Kaban Parlimen (MP) Limbang Hasbi Habibollah madahka perintah Sarawak komited deka ngemansangka perengkaguna pemun baka bekal ai beresi, elekterik enggau jalai alun ba kandang menua pesisir di Medamit ditu.
Iya madah pemansang ke guna nya patut dilengkaska ba taun tu laban bisi kandang menua ti bedau disikap penuh enggau bekal elekterik sereta bekal ai menua pesisir.
“Entara fokus besai ke patut dikemerat taun tu iya nya nyendiaka perengkaguna pemun nyengkaum bekal elekterik enggau bekal ai di menua pesisir tu,” ku iya madah ngagai pengarang berita kemari.
Hasbi nerang nyauka semua kandang menua pesisir udah bisi bekal elekterik.
“Semina bisi sekeda kandang menua, baka rumah panjai iya nya Rumah Lawai, Rumah Jampong enggau Rumah Entakong ke benung diberi bekal elekterik ari baruh perintah Sarawak,” ku iya agi.
Berebak enggau nya, enti udah tembu ngaga projek tangki ai tinggi di Medamit, peranak di kandang menua pesisir nya deka diberi ai beresi.
“Nya alai, perengkaguna pemun rayat ke bedau dijapai penuh deka dikemerat taun tu,” ku iya.
Iya madah agi, opis sida mega merambu deka ngaga tangki ai tinggi di Pasar Medamit enggau sekeda genturung pendiau di seberai sungai nyengkaum genturung pendiau seberai sungai laban palan nya ulih nampung penyampau ai ke mayuh kelebih agi maya penusah nadai ai ti bepalan jauh ari mengeri.
“Langgur deka ngaga tangki ai tinggi ba palan nya udah dikenataika ngagai Menteri Muda Bekal Ai Sarawak Datuk Dr Abdul Rahman Junaidi maya penemuai iya ke Limbang lebuh bejalaika Projek Bekal Ai Alternatif Sarawak (SAWAS) Disember nyin tadi,” ku iya.
Sekeda pekara ti dikemerat mega iya nya bekaul jalai alun enggau jalai penyambung ke bukai.
Hasbi asa enggau pemujur projek Jalai Besai Pan Borneo (PBH) Renggat Dua ngaul Limbang enggau Lawa ke alai pengawa ngaga nya dilanjar lalu dikearap projek nya ulih diteruska baru.
Nerang sentang projek ke dilanjar iya nya Klinik Napir, Hasbi madah projek ke udah 40 peratus digaga nya ditender baru laban bisi penanggul ungkus belanja niki enggau rega projek ti begunaka pemendar ari Opis Menteri Pekara Wang.
“Aku deka terus matau pemujur projek tu ti beguna bendar ngagai peranak Penan di pesisir,” ku iya agi.