LAWAS: Pengelurus politik ti dipandangka Parti Pesaka Bumiputera Bersatu (PBB) entara kebuah ke mujur matak raban nembiak nyereta parti nya lalu bulih pengandal sereta dipechayaka rayat.
Kaban Kaunsil Kereja Tetinggi (MKT) Parti PBB Sarawak Kunsilor Awangku Jinal Abidin Pengiran Jawa madahka, ari pengandal nya PBB ulih nyadika parti nya entara parti politik dominan di nengeri tu.
Iya madah laban pengelurus nya mega ku iya, politik Sarawak tegap nyentukka bala ketuai parti beratka ngagai sukut pemansang.
“Pengelurus parti PBB dalam ngatur penanggul ti ditapi rayat deka seruran ditegapka nengah chara ngabas kediri betemu rayat sereta bejalaika kereja pengelantang pendiau mantu rayat ti kurang penatai pemisi,” ku iya maya ngabas kaunter rejista ti diatur indu opis parti PBB Sarawak di Lawas.
Iya madah PBB kelebih agi pampang Bukit Sari Lawas seruran ngelaluka penyereta raban nembiak nyadi kaban parti PBB lalu nyadika parti PBB dikena mantaika semua runding enggau kedeka raban nembiak.
Iya madah PBB Sarawak pampang Bukit Sari udah mujur ngerikodka sepenyampau 1,600 iku kaban baru naka diatu.
Peniki penyampau nya ku iya mandangka parti PBB terus nyadi ke pilih rayat Sarawak kelebih agi ba kandang menua pesisir baka Lawas.
Iya mega ngelalau sida ngambika sida ti deka ngerejista nyadi kaban terus datai ngagai Palan Servis Parti PBB Pampang Bukit Sari.
Parti PBB Pampang Bukit Sari diketuaika Sapit Kepala Menteri Datuk Amar Tengah Ali Hasan enggau Awangku Jinal ti nyadi Sapit Ketuai Pampang Parti PBB Bukit Sari.