BINTULU: Pengawa matau nagang kes penyalah ari raban polis Bintulu dipejalaika ba semua renggat dikena nentuka pengelantang enggau pengawa ninting hari peranak di bagi menua tu semampai likun sereta selamat.
Ketuai Polis Pelilih Bintulu Superitenden Zulkipli Suhaili madah, dalam juluk nya kitai ukai semina bejalaika pengawa matau nagang kes penyalah ngena kerita matau polis (MPV) tang mega unit matau ngena mutosikal (URB).
Ku iya, nambahka mayuh macham program ke bukai bisi digaga ti mungkur program ‘Omnipresence’ ti nyengkaum penetap tanggungpengawa raban polis ke bedarat tetemuka orang ti ngempu kedai, betanya penanggul enggau ke bukai dikena ngumpul penerang kelebih agi dalam nagang pengawa jai.
Iya madah, bisi pemesai enggau raban kitai bejalai kaki bejalaika pengawa matau lalu kitai mega netapka zon ungkup pengawa matau bepelasarka pansik ti digaga.
Zulkipli madah, asil ari program tu kitai deka neruska dalam pengawa nentuka penatai polis ba sesebengkah endur lalu nengah matau ngena MPV, kitai deka ngaga pansik kes ba sesebuah palan, bejalaika pengawa matau suah agi enggau ke bukai.
“Nengah penegap polis di Bintulu semina lebih 335 iku orang aja dibanding penyampau peranak dalam 300,000 iku sereta pemesai pelilih Bintulu ke patut dijaga iya nya 12,000 kilometer persegi tang nya ukai penanggul ba kami deka ngangkatka tikas pengawa matau enggau ke bukai dikena nagang pengawa jai,” ku iya nerang.