KUCHING: Pembukaan Tahun Perundangan 2020 (OLY 2020) Kort Tinggi Sabah enggau Sarawak iya nya pengerami kepenudi digulu Tan Sri Datuk Seri Panglima David Wong Dak Wah nyadi Akim Besai Kort Tinggi Sabah enggau Sarawak sebedau bepinchin bulan baru.
Wong, 66, ti dichiri nyadi Akim Besai Sabah enggau Sarawak kena 11 Julai 2018, deka bepinchin dalam bulan Februari tu ila.
“Hari Lima (Jumaat) nyin tadi, Ketuai Akim Malaysia kitai keterubah iya bejaku ba OLY 2020 di Pusat Konvensyen Antarabangsa di Putrajaya.
“Seharitu (Kemari), baka Ketuai Akim ti berengkah enggau fasa pengidup ke baru, aku mega enda lama agi deka berengkah enggau fasa pengidup baru - asai aku sida nyebut nya ‘pinchin’.
“Nya alai seharitu (kemari) aku deka meri jaku kepenudi aku nyadi Akim Besai Sabah enggau Sarawak,” ku iya.
Wong nyebut lebuh bejaku ba OLY 2020 Kort Tinggi sabah enggau Sarawak ti diatur ba Kompleks Kort Kuching ditu, kemari.
Pengerami OLY diatur tiap taun, lalu ungkup Kort Sabah enggau Kort Sarawak diatur begintir endur.
“Kebendar, taun tu OLY tu patut iya diatur di Bintulu, aku minta ampun ba pekara tu.
“Urung 14 taun lima bulan ke udah ba bulan Ogos 2005, aku ngeriput gawa nyadi Persuruhjaya Kehakiman ba Kort Tinggi Kuching.
“Enti ulih aku minta ampun milih Kuching endur ngatur OLTY taun tu laban aku ngasaika lebih manah endur aku nembuka kereja aku dalam badan kehakiman di mengeri Kuching ti manah tu,” ku iya.
Berebak enggau tu iya beterima kasih ngagai semua pengemeran undang-undang, pengereja pengawa sereta semua ti meri sukung sereta bekerejasama enggau iya.
Nitihku Ketuai Akim Malaysia Tan Sri Tengku Maimun Tuan Mat pengerami makai malam beserara khas wong deka diatur di Kota Kinabalu.