KUCHING: Lebih 1,000 pengemeran undang-undang ari Sarawak enggau Sabah ngulu Majlis Pembukaan Tahun Perundangan 2020 (OLY 2020) Kort Tinggi Sabah enggau Sarawak ti diatur ba Kompleks Kort Kuching ditu, kemari.
Atur pengawa nya berengkah enggau bejalai bebala mayuh ari Kunsil Nengeri (DUN) Baru nuju ngagai Kompleks Kort Kuching, ti berengkah diatur ari pukul 7.30 pagi ngagai 8.30 pagi.
Pengerami OLY nya siti program pemadu besai reti dalam kalinda tiap taun Kort Tinggi Sabah enggau Sarawak, sereta diatur begintir entara Kort Tinggi Sarawak enggau Kort Tinggi Sabah.
Rambai jaku OLY 2020 Kort Tinggi Sabah enggau Sarawak iya nya ‘Justice and Beyond’ setipak enggau rambai jaku OLY 2020 di Putrajaya iya nya ‘Moving Forward’.
Rambai jaku nya dipilih setipak enggau misyen Badan Kehakiman Malaysia deka nyadi Badan Kehakiman ti moden enggau beteknologi tinggi.
Laban berengkah taun 2020 Badan Kehakiman Malaysia deka ngenyakahka agi pengawa ngena teknologi dalam pengawa kereja sida besehari-hari enggau meri kelala beberapa inisiatif baru senipak enggu juluk perintah nuju Revolusyen Industri 4.0 enggau Wawasan Kemakmuran Bersama 2030.
Pengerami OLY 2020 Kort Tinggi Sabah enggau Sarawak bisi digulu Ketuai Akim Menua Tan Sri Tengku Maimun Tuan Mat, Presiden Mahkamah Rayuan Datuk Rohana Yusuf, Akim Besai Semenanjung Malaysia Tan Sri Dato Sri Azahar Mohamed, Akim Besai Sabah enggau Sarawak Tan Sri Datuk Seri Panglima David Wong Dak Wah enggau bala akim sereta pengemeran undang-undang ari Sabah enggau Sarawak.
Nambahka nya Pengari Mendam United Nation Development Programme (UNDP) ke Malaysia, Singapura dan Brunei, sereta pengari Kedutaan Amerika Kuala Lumpur enggau Suruhanjaya Tinggi Australia Malaysia enggau pengemeran undang-undang ari menua luar mega sama bisi datai.
Sama bisi datai Speaker DUN Sarawak Datuk Amar Mohamad Asfia Awang Nassar, Menteri Muda ba Opis Kepala Menteri (Undang-undang, Kaul Perintah Nengeri-Besai enggau Pematau Projek) Datuk Sharifah Hasidah Sayeed Aman Ghazali sereta Sapit Speaker DUN Sarawak Dato Gerawat Gala.
Nyerumba OLY 2020, Kort Tinggi Sabah enggau Sarawak bejadi beberapa inisiatif inovatif baru dikena ngenegapka sistem ngakim di Sabah enggau Sarawak.
Inisiatif inovatif baru keterubah iya nya pelasar media rama Kort Tinggi Sabah enggau Sarawak ti mai tuju dikena ngenyemakka raban bansa enggau bidang akim nengah ngenataika penerang baka servis ti disediaka Kort, penerang kes, ‘alasan penghakiman’, info grafik jaku undang-undang enggau aktiviti Kort.
Kedua, Pusat Maklumat dan Khidmat Mahkamah (Court Services and Public Information Centre) - COSPIC iya nya palan ti meri penerang ngagai mensia mayuh pasal servis kort enggau mantu mensia mayuh ti deka ngarika diri empu di dalam Kort. Nambahka nya COSPIC mutarka sebana enggau nyadi Palan Media.
Ketiga, Teknologi Kecerdasan Buatan (Artificial Intelligence) Mahkamah bagi Data Jatuh Hukum (Sentencing Data). Teknologi tu mantu Akim enggau Majistret ngaga analisa ukum ti patut diberi ngagai orang ke dituduh.