KUCHING: Ketuai Akim Malaysia Tan Sri Tengku Maimun Tuan Mat ngaku Kort Tinggi Sabah enggau Sarawak dulu agi ngemeran sereta ngemeratka teknologi.
Iya madahka kort di Semenanjung Malaysia entudi kort Sabah enggau Sarawak dalam teknologi.
“Au. Enti dibandingka enggau Semenanjung, Sabah enggau Sarawak dulu agi ari kami. Laban asai aku Sabah enggau Sarawak dulu berengkah 2006 2007, kami (Semenanjung) nangkanka nya.
“Kami belajar ari Sabah enggau Sarawak bekaul enggau teknologi,” ku iya lebuh dikerandau raban pemberita nyerumba pengawa mandangka Teknologi AI ti dikemeranka Kort Tinggi Sabah enggau Sarawak ba Kompleks Kort Kuching, kemari.
Dulu ari nya Tengku Maimun ngulu Majlis Pembukaan Tahun Perundangan 2020 (OLY 2020), Kort Tinggi Sabah enggau Sarawak ti diatur ba Kompleks Kort Kuching ditu.
Tengku Maimun dulu ari nya madah kort patut berubah nitihka ubah teknologi sereta berengkah ngena baka teknologi Artificial Intelligence (AI) Kort dikena ngumpul sereta mansik Data Jatuh Hukum (Sentencing Data).
Teknologi nya ulih mantu Akim enggau Majistret ngaga analisa ukum ti setipak enggau ukum ngagai orang ke dituduh, kelimpah ari ulih mantu ngurangka takah ukum sereta nentuka nya enda bechiping sereta seruran konsisten ba ukum ke diberi ngagai orang ti dituduh.
Taja pia, pemutus penemu Akim enggau Majistret agi enda tekeruga ketegal teknologi tu enggau pemutus ke digaga bepanggai ngagai fakta kes.
“Kitai patut berubah nitihka ubah teknologi. Aku nadai meda nama kebuah kitai enda berengkah enggau tu (teknologi baka AI).
“Tang udah tentu mega, aku ngasaika kitai enda ulih bepanggai 100 peratus ngagai teknologi laban patut mega bisi elemen mensia.
“Baka ke ditemu kitai tu (teknologi AI) projek pemungkal, kitai deka bejalaika projek tu, kitai deka meda bakani kitai patut ngemanahka agi tauka enda ibuh,” ku iya lebuh bejaku maya pengawa mandangka teknologi AI nya.
Nitihku Akim Besai Sabah enggau Sarawak Tan Sri Datuk Seri Panglima David Wong Day Wah madahka teknologi AI ngemuntangka agi pengawa Akim enggau Majistret.
Kebuah pia ku iya, laban dalam sistem nya bisi semua data disimpan baka umur, pemayuh dadah enggau ke bukai.
“Semua kes bisi dalam sistem tu (AI) ke ulih nyadi malin. Teknologi AI tu udah berengkah dikena sereta naka ke diatu semina ungkup Akim,” ku iya ti dulu ari nya mega ngulu OLY 2020.