KUCHING: Kort Tinggi Sabah enggau Sarawak ngemeranka teknologi Artificial Intelligence (AI) iya nya inisiatif inovatif baru dikena ngenegapka sistem ngakim di Sabah enggau Sarawak.
Ketuai Akim Menua Malaysia, Tan Sri Tengku Maimun Tuan Mat madahka, kort patut berubah nitihka ubah teknologi sereta berengkah ngena baka teknologi AI.
Teknologi AI Kort ungkup Data Jatuh Hukum (Sentencing Data) nya ulih mantu Akim enggau Majistret ngaga pansik bansa ukum ti setipak ke diberi ngagai orang ke dituduh, kelimpah ari ulih mantu ngurangka takah ukum sereta nentuka enda bechiping enggau konsistensi ba ukum ke diberi ngagai orang ti dituduh.
Taja pia, budi bicara Akim enggau Majistret agi enda tekeruga ketegal teknologi tu enggau pemutus ke digaga bepanggai ngagai fakta kes.
"Kitai patut berubah nitihka ubah teknologi. Aku nadai meda nama kebuah kitai enda berengkah enggau tu (teknologi baka AI).
"Tang udah tentu mega, aku ngasaika kitai enda ulih bepanggai 100 peratus ngagai teknologi laban patut mega bisi elemen mensia.
"Baka ke ditemu kitai tu (teknologi AI) projek rpemungkal, kitai deka bejalaika projek tu, kitai deka meda bakani kitai patut ngemanahka agi tauka enda," ku iya lebuh bejaku maya pengawa mandangka teknologi AI ti dikemeranka Kort Tinggi Sabah enggau Sarawak, seharitu.
Dulu ari nya Tengku Maimun ngulu Majlis Pembukaan Tahun Perundangan 2020 (OLY 2020), Kort Tinggi Sabah enggau Sarawak ti diatur ba Kompleks Kort Kuching ditu.
Berebak enggau tu Tengku Maimun ngaku Kort Tinggi Sabah enggau Sarawak lebih dulu agi ngemeran sereta ngemeratka teknologi dibandingka enggau Semenanjung Malaysia.
Kort di Semenanjung nangkanka Kort Tinggi Sabah enggau Sarawak ti berengkah ngemeranka teknologi ari taun 2006 tauka 2007, ku iya.
"Au, enti dibandingka enggau Semenanjung Malaysia, (Kort Tinggi) Sabah enggau Sarawak dulu ari kami.
"Kami belajar ari (Kort Tinggi) Sabah enggau Sarawak bekaul enggau teknologi," ku iya lebuh ditanya bekaul pekara tu.
Nitih ku Akim Besai Sabah enggau Sarawak Tan Sri Datuk Seri Panglima David Wong Day Wah madahka teknologi AI ngemuntangka agi pengawa Akim enggau Majistret.
Kebuah pia ku iya, laban dalam sistem nya bisi semua data disimpan baka umur, pemayuh dadah enggau ke bukai.
"Semua kes bisi dalam sistem tu (AI) ke ulih nyadi malin. Teknologi AI tu deka berengkah dikena pengudah atur asas digaga sereta ditembuka dalam seminggu," ku iya lebuh ditanya silik bekaul enggau AI.