BINTULU: Komuniti orang berikan enggau mairitim di bagi menua tu dilalau ngambi nentuka pengelikun seruran dijaga sekalika ba bot tauka di darat lebuh ti bejalaika tanggungpengawa tauka berikan ngambika nadai sebarang kes bebadi nyadi.
Direktor Ejensi Penerit Adat Tasik Malaysia (APMM) Zon Bintulu Kapten Maritim Shahref Mac Queen Abdullah madah, pekara pemun ti patut digaga komuniti maritim iya nya enggau ngena jaket pengelikun.
“Taja pan pengawa ngiga enggau nyelamat udah nyadi tanggungpengawa penerit adat maritim, tang aku minta semua orang berikan enggau komuniti maritim ti bejalaika pengawa ngiga penatai pemisi di tasik mega patut megai tanggungpengawa sida enggau ngemerat sereta ngemeranka pengelikun,” ku iya.
Iya bejaku munyi nya lebuh ti bejadi Program Pemereti Ati Bekaul Pengelikun di Tasik sereta Randau Begulai enggau Komuniti Nelayan ba Balai Raya Kampung Jepak kemari.
Nya alai Shahref madah, penemu mensia mayuh kelebih agi komuniti maritim di kandang menua tu ti nyengkaum orang berikan, orang ti nginti, pedagang enggau pekereja kapal, feri, bot sereta komuniti patut seruran dikeingat ngambika sida nemu pemerat nyaga pengelikun lebuh ti ba tasik.
Bekaul program nyab ku iya, nya siti program ari baruh program Sahabat Maritim sereta siti tanggungpengawa rama korporat (CSR) ejensi penerit adat maritim ngagai komuniti maritim sereta nyadi pelasar dikena ngerapitka kaul sereta kerejasama enggau ejensi perintah, kompeni korporat sereta komuniti di kandang menua tu.
“Nengah pengawa nya, dikearap ulih meri pemereti ati ngagai komuniti di kandang menua nya dikena nentuka sida nitihka undang-undang enggau atur pengelikun di tasik ninting maya ke lalu ulih ngurangka kes bebadi sereta bebadi nyawa lebuh ti ba tasik,” ku iya nyemetak.
Dulu agi ari nya, beberapa licha pengelikun bekaul operasyen ngiga enggau nyelamat (SAR) udah digaga APMM Zon Bintulu, licha pengelikun ba platform minyak enggau gis ari Petronas Carigali Sdn Bhd sereta sesi nyaut tanya begulai enggau komuniti orang berikan.
Kelimpah ari nya, pengawa nyuaka pemeri ngagai 27 asnaf sereta nyuaka setipikit basa ngagai tiga iku orang berikan ti udah mantu APMM Zon Maritim Bintulu dalam operasyen SAR orang berikan ke lenyau kena November taun nyin tadi.
Sama bisi datai Sapit Direktor (Operasyen) Zon Maritim Bintulu Komander Maritim Effendy Mohamed Fadil, Pemesai Opis Pemansang Orang Berikan Malaysia (LKIM) Wilayah 3 Miri Raymond Rosidih, Menijer Gerempung Orang Berikan Kandang Menua (PNK) Bintulu Awang Ismail Awang Sharie, Chairman PNK Bintulu Jumat Brahim, Ketuai Eksekutif Sekuriti Petronas Carigali Sdn Bhd-Sarawak Gas Onn Itam enggau Penghulu Drahman Kawi.