KUCHING: Juluk deka meda Persatuan Peguambela-Peguambela Sarawak (AAS) nyadi Badan Berkanun agi lama.
Presiden AAS, Ranbir Singh Sangha madahka, nya berindik ari bisi penemu ti bebida ari tiap pampang.
"Pengandal Persatuan Peguambela-Penguambela Sarawak (ASS) deka nyadi Badan Berkanun agi lama ari ti ditaga tauka dipelaba.
"Tu laban kami ti deka agi ngaga pemutus bekaul enggau Badan Berkanun dipejalaika nengah konsensus.
"Bisi penemu ti bebida ari pampang kami ti ngujungka tesangkut deka nyapai majoriti dua pertiga ti diguna dikena nukar konstitusyen Persatuan Peguambela-Peguambela Sarawak," ku iya, seharitu.
Ranbir mansutka pekara nya nyerumba Majlis Pembukaan Tahun Perundangan 2020 (OLY 2020) Kort Tinggi Sabah enggau Sarawak ba Kompleks Kort Kuching ditu.
Bejaku baru Ranbir madahka sida iya deka ngatur aum enda lama agi dikena ngurang sereta nentuka bida penemu sida iya.
"Taja pia, kami beserakup enggau penemu iya nya Persatuan Peguambela-Peguambela Sarawak patut nyadi siti Badan Berkanun enggau semina bisi siti Persatuan Peguambela-Peguambela Sarawak ungkup serata nengeri tu," ku iya.
AAS bisi empat pampang di Kuching, Sibu, Bintulu enggau Miri.
Kelimpah ari nya iya madahka bisi 900 pengemeran undang-undang di Sarawak ulih kena Tindakan Tatatertib nyema sebana pasal sida nya bisi diterima.
Nitihku iya ari penyampau nya (900) nyengkaum urung 500 iku pengemeran undang-undang di Kuching sereta lebih 400 pengemeran undang-undang ti mungkur di Sibu, Bintu enggau Miri.
Iya madahka AAS bisi Disciplinary Inquiry Committee.
"Aku ngambi peluang tu madah ngagai mensia mayuh nyema bisi sebarang sebana pasal pengawa ti salah tauka enda nitihka etika ari raban Peguambela (Advocates) di Sarawak, Disciplinary Inquiry Committee bisi meri sida 'fair hearing'.
"Mensia mayuh patut nemu, kami nadai nerima sebarang sebana ngena jaku mulut. Tang pom sebana bisi ba tiap 'bar room' di Sarawak," ku iya seraya madah bisi nerima sebana nengah jaku mulut tang enda ulih bejalaika atur nyentuk nerima sebana rasmi ti diterima Inquiry Committe.
Sama bisi ngulu OLY 2020 nya kemari, Ketuai Akim Malaysia Tan Sri Tengku Maimun Tuan Mat, Presiden Mahkamah Rayuan Datuk Rohana Yusuf, Akim Besai Sabah enggau Sarawak Tan Sri Datuk Seri Panglima David Wong Dak Wah, Speaker Kunsil Nengeri Sarawak Datuk Amar Mohamad Asfia Awang Nasar, Menteri Muda ba Opis Kepala Menteri (Undang-undang, Kaul Perintah Nengeri-Besai enggau pematau Projek) Datuk Sharifah Hasidah Sayeed Aman Ghazali enggau pengemeran undang-undang sereta akim ari Sabah enggau Sarawak sereta ke bukai.